Depués de que nos vendieren la necesidá de presllar les mines pol impactu ecolóxicu del llogru d’eletricidá nes centrales térmiques, agora los parques eólicos menacien muncho más el patrimoniu natural, cultural, social y económicu asturianu

“Hai que recordar que’l desendolcu d’estes instalaciones nel mediu rural asturianu, nin xeneren empléu na zona, nin beneficios sociales, nin frenen la despoblación, sinón más bien tolo contrario”

Delles sociaciones vecinales de Candamo, Grau, Illas y les Regueres xúnense nuna Plataforma contra’l parque eólicu Bufarán, col envís d’encadarmar un frente común y movilizase contra’l macroproyectu eólicu de Bufaran, que la empresa Repsol pretende construyir na redolada de les sos cases.

Los vecinos d’esta zona del centru de Asturies,  repartíos n’abondos pequenos núcleos rurales y viviendes espardies  nuna redolada única,ven apeligrar la so calidá de vida al vese gravemente afectaos por esti proyectu el so patrimoniu natural y cultural.

El proyectu eólicu de 68,2 MW que la empresa Repsol pretende desenvolver na Sierra de Bufarán, nos
montes de Sollera, Cimeru y Tablao, y qu’afecta a la población y al patrimoniu natural de los conceyos de Candamo, Grau, Illas y -les Regueres, va ser unu de los mayores complexos eólicos plantegaos pa Asturies, con 11 aeroxeneradores de 200 metros d’altor, 19,61 km de llínees eléctriques d’alta y media tensión, 9,5 km de pistes de 6 metros d’anchor y una subestación eléctrica.
Tal como denuncia la plataforma, el desendolcu d’esta central eólica supondría tamién la instalación de decenes de kilómetros de llínees eléctriques d’alta y media tensión, subestaciones eléctriques y kilómetros de pistes d’accesu, que pondríen en riesgu’l patrimoniu natural de la redolada y la salú y calidá de vida de los sos habitantes.

Tou ello nun espaciu consideráu “área de distribución actual y potencial d’osu pardu” y declaráu pola normativa asturiana d’ordenación y zonificación del aprovechamientu eólicu como “zona de baxa capacidá d’acoyida”, onde namás se permiten “instalaciones eóliques de pequena entidá,  non grandes parques”.
La Plataforma Contra’l Proyectu Eólicu de Bufarán esclaria que nun s’opón a proyectos industriales d’aprovechamientu de la enerxía eólica pa xeneración eléctrica, pero siempres que seya en terrenes industriales o zones yá degradaes, onde los impactos ambientales seyan mínimos y la so implantación redunde nun beneficiu social pa la población de la redolada; esti nun ye’l casu.
Entre los impactos negativos del Proyectu cúntase la contaminación acústica,  electromagnética y llumínica, el riesgu de destrucción o contaminación d’acuíferos, manantiales y puntos de toma d’agua de consumu humanu, graves afectaciones a carreteres y caminos, perda patrimonial de viviendes y terrenes, aumentu esponencial del riesgu de quemes nuna zona yá considerada como de “bien altu riesgu” pol Principáu, afectación a negocios d’hostelería y turismu rural, amenorgamientu de les ayudes de la PAC y graves afecciones a esplotaciones agroganaderas.
Amás, esti enclave natural del centro occidente asturianu ye una área clave para la supervivencia d’un
bon númberu d’especies de flora y fauna, y amás ye una zona de camín migratoriu para millones
d’aves: solo na zona que se vería afectada pol proyectu cunta con siquier 136 especies d’aves, 19 especies d’esperteyos, 36 especies d’otros mamíferos, entre los que destaca l’osu pardu, 8 anfibios, 10 reptiles y siquier 9 especies d’invertebraos, gran parte d’ellos catalogaos como en peligru d’estinción y teóricamente protexíos. Les aves son les que se van ver más directamente afectaes -basta ver el campusantu aviar alredor de cualquier torre eólica-, pero nun son los únicos. 
Produciríase amás la destrucción directa d’especies protexíes de flora y de Hábitats d’Interés Comuñal, dalgunos d’ellos prioritarios, protexíos pola Comisión Europea.
Nun hai qu’escaecer tampoco’l patrimoniu cultural de la zona onde pretende desenvolvese el proyectu eólicu de Bufarán, bien conocida pola gran riqueza de los sos xacimientos arqueolóxicos, incluyendo fueses comunes ensin escavar.  Tamién el Camín de Santiago veríase afectáu. 
Magar ye ciertu que la instalación de centrales eóliques supon unos ingresos estra pa les arques municipales y pa dellos propietarios privaos, lo cierto ye que se trata de beneficios brutos, que resulten
risibles si comparar colos beneficios que llogren les empreses eléctriques y que nun compensen les perdes económiques, sociales, patrimoniales y naturales sufiertes pola ciudadanía y la redolada. 
Amás de la presentación de cientos d’allegamientos en contra del proyectu, per parte de les
asociaciones vecinales y particulares qu’acomuñen en redol a la plataforma, la Plataforma Contra’l
Proyectu Eólicu de Bufarán cuenta col sofitu d’otros colectivos y plataformes, como les plataformes que lluchen contra la implantación de los parques de bateríes na redolada rural.

Toles plataformes xuníes preven movilizaciones sociales y otres acciones para llograr paralizar esti gafíu proyectu para la salú de les persones y el mediu ambiente asturianu. Nesi sen, Andecha Astur entamó va tiempu una recoyía de robles en change.org comu parte de la campaña contra la istalación indiscriminao de molinos eólicos y pa conseguir una moratoria en materia d’esplotación d’enerxía eólica terrestre, eólica marítima y fotovoltaica

“La falta d’un marcu normativu qu’asegure la proteición de los ecosistemes y la biodiversidá del paisax, del padremuñu hestóricu, cultural y arqueolóxicu, de les actividaes del seutor primariu y, en xeneral, del mou de vida de l’Asturies rural, fae posible que se roblen concesiones a parques eólicos que perxudiquen bultablemente a los asturianos nel so conxuntu y a los vecinos de los llugares onde s’istalen mui particularmente, poniendo en pelligru los sos trabayos y formes de vida”, declaren.  Con ello, razonen dende Andecha Astur, afóndase nel problema del despoblamientu y del desemplegu, al mesmu tiempu que se causen firies irreparables a la ñatura ya’l padremuñu asturianos, beneficiando namás a los oligopolios enerxéticos. 

Llucía F. Marqués

This work is licensed under a Creative Commons Attribution 4.0 International License.