Adrián Barbón y otros dirixentes socialistes pasaron delantre les pancartes de la Plataforma Salvemos Peñamayor ensin el más mínimu xeitu d’interés pola revindicación
De siguir alantre’l proyeutu, l’homenaxe a los héroes del Pozu Funeres fadríase nun paisaxe estrozáu
El sábadu 14 se Setiembre una representación de les vecines y vecinos qu’integren la plataforma Salvemos Peñamayor concentrláronse na Campa Gües para recibir a los miembros del partíu socialista qu’esi día, como lleven faciendo a lo llargo d’años, allegaben al Pozu Funeres a rindir homenaxe a los antifranquistes asesinaos nel añu 1948.
La intención d’esta concentración, silenciosa y respetuosa col significáu del actu d’alcordanza yera poner de relieve sobro’l terrén les implicaciones que tendría la puesta en marcha del proyectu d’investigación minera sobro la zona, asitiando a los responsables d’esta decisión frente a la realidá de les paraxes que tán entamando estrozar.
“Tán apelligrando seriamente esi monte que güei y dende va munchos años, tríen arguyosos revindicando la memoria de los qu’un día llucharon pola democracia”, espliquen dende la Plataforma, yá que na mesma paraxa hasta la que llegaron l’autobús y los coches de los miembros del partíu socialista pa coyer la caleya que los llevaba a un llugar tan emblemáticu como Funeres, hai previstes nel Proyectu d’Investigación presentáu pola empresa Asturmet, S.L.O. dos plataformes (en tol ámbitu van ser ocho en total) pa la realización de sondeos mecánicos, lo que supondría la esplanación de 20 m2 de terrén pa caúna d’elles y l’instalación de dos tales balses de decantación.
Al actu en Funeres asistíen personalidaes como’l Presidente del Principáu y l’Alcalde de Llaviana, ente otros dirixentes del partíu, que pasaron énte les pancartes ensin el más mínimu xestu d’interés pola revindicación, de la que sicasí sí s’informaron dellos ciudadanos.
Los vecinos y vecines entrúguense si nun futuru non llonxanu va siguir siendo posible celebrar esti tipu d’actos, pasiar pel monte o esfrutar d’estes vistes. Poro, piden “que nos dexen el monte como ta, porque protexelo y esfrutalo ye cosa de toos”.
Dende Salvemos Peñamayor les vecines y vecinos van siguir llevando a cabu tou les acciones que tean nes sos manes pa intentar qu’esti proyectu d’investigación nun siga alantre.
Nel Dos Santos
This work is licensed under a Creative Commons Attribution 4.0 International License.
