De un lláu, los muertos, del otru, los beneficios. A les empreses nun yos paga la pena enfotase na seguridá llaboral y los resultaos tan a la vista.
La escasez d’inspectores -denuncien ya delles voces- y la ruindá de les sanciones, afalen a les empreses a arriesgar, aforrando en prevención de riesgos llaborales, y les consecuencies son tráxiques.
Once muertos nel trabayu en nueve meses, cuatro nun mes que ya entama considerase “Setiembre prietu” y nel que hai que sumar munchos ferios graves: los sobrovivientes del accidente de la grua d’El Musel, los afectaos pola esplosión d’Arcelor y ayeri mesmo, los firios por una descarga eléctrica na empresa Tadarsa, n’Avilés.
Acordies los caberos datos oficiales espublizaos pola Sociedá Asturiana d’Estudios Económicos ya Industriales (Sadei), ente los meses de xineru y xunetu contabilizáronse n’Asturies 6.785 accidentes llaborales con baxa, de los que 45 foron pergraves.
Dende Andecha Astur consideren que la precariedá llaboral que se vive n’Asturies ye una de les xides que prevoca esta desaxerada siniestrabilidá nel trabayu. “Nun pue ser que dir a trabayar suponga poner en riesgu la vida”, declararon.
Nel Dos Santos
This work is licensed under a Creative Commons Attribution 4.0 International License.
