El Centru d’Adultos de Siero paga les consecuencies del enfrentamientu internu ente los socialistes Adrián Barbón y l’alcalde sierense, Angel García “Cepi”
El pasáu 14 de xunu, el Conceyu de Siero dirixóse oficialmente a la Conseyería d’Educación
pa comunica-yos que’l Centru d’Educación de Persones Adultes de Siero (CEPA), dependiente de l’alministración autonómica, sedría desallugáu del edificiu nel que s’atopa, propiedá de l’alministración
municipal, “pola mor del estáu ruinosu del mesmu”.
Darréu la Dirección Xeneral de Centros solicitó al Conceyu otru llugar onde reasitiar la CEPA, a lo que l’alcalde retrucó afirmando que nun se dispón de nengún espaciu en tol conceyu pa realizar la reubicación.
La solución, espérase que temporal, adoptada’l 13 d’agostu ye la de reasitiar a la CEPA de Siero dientro les instalaciones del IES Ríu Nora de La Pola, colos siguientes entueyos y molesties pa dambes partes. El Centru d’Adultos vese llindáu a dar clases namás pela tarde y l’institutu, amás de multiplicar les xeres d’atención al públicu, pierde espacios pa realizar el so llabor docente; espacios que per otra parte son insuficientes pal CEPA.
El profesoráu tamién se vio afectáu, al tener que treslladar tol material del centru al IES Ríu Nora
a la fin de les sos vacaciones, con dificultaes lloxístiques tremendes pa realizar un treslláu enorme nun tiempu récord y con falta d’espaciu.
Magar ye ciertu que les instalaciones de la CEPA tán realmente en mala traza, ello ye responsabilidá del propiu consistoriu y mientres dambes partes pasen la pelota, los alumnos -de la CEPA y del IES- y docentes paguen les consecuencies.
Nel Dos Santos
This work is licensed under a Creative Commons Attribution 4.0 International License.
