El Sábadu 28 Setiembre la solidaridá tien una cita en Xixón, nuna xornada folixero revindicativa qu’entamará con un manifestamientu y finará con conciertos fasta la nueche
Siguiendo cola abondosa riestra d’actividaes, dientro y fuera d’Asturies, de sofitu pa coles sindicalistes condergaes por exercer el sindicalismu, el prósimu sábadu trece sindicatos convoquen un manifestamientu que saldrá a les 12:00h, de la Plaza L’Humedal col llema “Facer Sindicalismu nun ye delitu”.
Darréu el mesmu, de 14 a 22 hores, cellebraráse una Folixa Solidaria na pista poliesportiva de Cimavilla, na qu’habrá música, xinta y Bébora, xuegos del país pa la reciella a cargu d’El Garrapiellu y Mercáu Solidariu.
La música tará a cargu de los DJ’s Miss Patxaran, Ximiélgalo Show, El Corrector, Nochnepitche Esbilla y les actuaciones d’Ún de Grao y A. Matraka.
Amás, la organización anuncia un photocall solidariu, cola idega de dar puxu a la presencia nes redes de la so vindicación, y una rifa de productos donaos por dellos donantes.
Tolos beneficios que s’algamen nesta folixa dirán pa financiar la campaña de sofitu a Les 6 de La Suiza.
Nel Dos Santos
This work is licensed under a Creative Commons Attribution 4.0 International License.
