De magar el 30 de setiembre, los descuentos de bonu social dirán amenorgándose de forma progresiva según el RDL 4/2024, aprebáu pol gobiernu más progresista y social de la hestoria d’España
Aquelles persones en situación de vulnerabilidá económica, paraos, perceptores del IMV o Salariu Social y aquellos cuyos ingresos nun yos permitan facer frente a unos gastos mínimos pa desendolcar una vida digna tan recibiendo el conocíu comu Bonu Social, un importante descuentu porcentual na factura mensual que permitía a estes persones quedar fuera de la probitú enerxética.
Los perceptores d’esti bonu tan recibiendo notificaciones de la fin del mesmu, que dirá realizándose de manera progresiva pa que nun se note tanto y nun se cause alarma social.
El descuentu porcentual nel coste de la ellectricidá que taba descontándose de la factura de la lluz de les persones y families más vulnerables entama a desapaecer el mes d’ochobre. Asina, un Consumidor Vulnerable Severu caltendrá un descuentu del 72,5% fasta fin d’añu, del un de xineru al 31 de marzu de 2025 el porcentaxe descontáu sedrá del 65%, del ún d’abril de 2025 hasta’l 30 de xunu de 2025 baxará al 57,5% y finalmente, de magar l’un de xunetu quedará nun 50%.
Pal iviernu del 2025 la calefacción ya incluso l’agua caliente o la llavadora tornará ser un lluxu que munches families asturianes nun van poder permitise. Esta perda de sofitos dase nuna situación na que la capacidá alquisitiva ta baxo mínimos y vien a apiorar la difícil sosistencia de munches persones que sumarán a les sos dificultaes actuales una probitú enerxética de la que fasta agora yos llibra el Bonu Social.
Nel Dos Santos
This work is licensed under a Creative Commons Attribution 4.0 International License.
