Mañana arrinca’l 14º Salón Internacional de les Sidres de Gala –SISGA-, l’alcuentru de profesionales del sector sidreru qu’axunta a más de cien llagares de tol mundu, amás d’ importadores, esportadores, hosteleros y comunicadores
Dende’l xueves y hasta’ll domingu Xixón ye más que nunca capital internacional de la sidra. El Salón Internacional de les Sidres de Gala, SISGA, entamáu pola Fundación Asturies XXI en collaboración cola Revista LA SIDRA, la Fundación Caxa Rural de Xixón, el Conceyu de Xixón y l’Escuela d’Hostelería y Turismu, cellebra la so catorceava edición, atrayendo profesionales de la sidra de tol mundu –llagareros, importadores, cosecheros, hosteleros y comunicadores del sector- que tienen yá a Asturies como referente y al SISGA como puntu d’alcuentru.
Mientres estos cuatro díes asoceden les actividaes venceyaes a esti sector: tasties, degustaciones de sidre y gastronomía asturiana, charres, visites, actos institucionales y los prestixosos premios SISGA, unos de los más valoraos a nivel internacional dientro del mundu de la sidra.
El programa d’actividaes del SISGA ye intensu y completu, yá que se trata, en solu cuatro díes, de dar a los participantes internacionales la visión más amplia y veraz de la cultura sidrera asturiana.
Aquellos sidreros qu’a cencielles vivan o s’atopen en Xixón estos díes, tamién pueden aprovechar pa esfrutar de delles d’estes propuestes sidreres y averase al panorama más internacional de la nuesa bébora.
Ensin dulda, la meyor opción para conocer les sidres del mundu presentes en Xixón esta fin de selmana ye la Tastia Abierta al Públicu, un puntu d’alcuentru con sidres de too el globu que constitúi una oportunidá única de tener, polos diez euros que cuesta la entrada, una imaxe global de la efervescente actualidá sidrera mundial, cola opción de prebar más de 200 productos sidreros –a cual más sorprendente- de la man de los sos propios ellaboradores: sidra brut, esplumosa, de mesa, de xelu, de fueu, semiseca, en vermú o aguardiente, ente otres opciones. Esti añu, amás, va poder comprase lconsumiciones individuales, al módicu preciu de dos euros.
La Tastia abierta va ser nel Pabellón de Congresos de la Feria Internacional d’Amueses d’Asturies, coincidiendo cola celebración AGROPEC, n’horariu de 12 a 15 y de 17 a 20 hores.
Amás de la esposición y cata de productos, esa mesma xornada van celebrase de manera abierta al públicu delles presentaciones de sidres per parte los sos productores.
En concreto, durante la mañana cuntaremos cola intervención de Benito Peciña, del Llagar Kuartango (Euskal Herría), quien presentará en tastia guiada la so nueva Sidre con Cannabis y de la llagarera checa Zuzana Kameníková, del llagar Cidérka.
A les cinco de la tardi tendrá llugar una Tastia guiada de sidre xaponesa a cargo del llagarero Tatsuro Fuji, de Fukiware Cidrerie y a las seis sedrá el turnu de la sidre asturiana cola Tastia Guiada de Sidra Exner a cargu del llagarero Daniel Exner. La cabera tastia de la xornada sedrá de la sidre escoces del llagar Seidear, que nos presentará el so ellaborador, Christian Stolte.
Pa quien quiera entrar nun contactu más cercanu con el productores o cenciellamente quiera vivir esperiencies sidreres de calidá, hai un númberu llindáu d’entraes disponibles pa compartir colos llagareros internacionales: les espiches que van cellebrase’l vienres en Nava -Llagar de Sorribes- y la tradicional espicha de xermandia que va tener llugar en Xixón, nel Llagar de Piñera.
Finalmente, como eventu especialmente pensáu pa los gourmets más esixentes, el domingu cellebraráse’l Brunch de Gala que va preceder a la entrega de los internacionalmente reconocíos Premios SISGA, nel Restorán El Duque y nel que’l chef Pedro Baldó va proponer una serie de maridaxes ente platos d’alta cocina y les sidres ganadores de los Premios SISGA, una esperiencia gastronómica perinteresante que se sal de tolo avezao y demuestra como la sidre puede satisfaer los gustos más esquisitos.
Alberto Rodríguez
This work is licensed under a Creative Commons Attribution 4.0 International License.
