Un añu más torna Ochobre, ya son 90, y otru añu más torna a quedar nel escaezu istitucional y académicu aquel Ochobre nel que los nuesos llucharon pola llibertá; nun pasó tantu tiempu como pa que seya posible que tantu dolor y valentía seyan escaecíos
90 años son pocos pa escaecer, malpenes una vida pero son abondos pa que los vencedores reescribieren la hestoria al so gustu y esborriasen lo que yos abultare peligroso. Si pueden evitalo nun se fala d’ello, y si se fae dase a entender que foi una revuelta espontania de trabayaores famientos, llamada a fracasar dende’l so entamu. Pesi a la descomanada repercusión nacional ya internacional de la Revolución d’Ochobre del 34, España trata de que s’escaeza la heroicidá del pueblu asturianu.
Escaezse a costafecha que la Revolución d’Ochobre del 34 supunxo pal pueblu trabayaor asturianu, amás d’una demostración ablucante de valentía, un llargu y meticulosu esfuerciu de planificación organizativa, política y militar. Sólo asina foi posible que naquellos díes ente 30.000 y 50.000 asturianes y asturianos armaos defendieren un oxetivu común y claru: poner en marcha darréu un nueu modelu social sofitáu nuna Asturies socialista y soberana y llibrase d’España, de la so República y del so sistema políticu y económicu que, pesi a toles promeses, caltenía los privilexos de los de siempres.
El movimientu obreru asturianu tenía nidio que nun podía aspirar a vivir llibre y dinamente si Asturies siguía sometía a la monarquía española, o a una dictaúra militar comu la de Primo Rivera, o a una república española comu la Segunda.
Poro, apostó por facer soberanu al Pueblu Asturianu y asumió Asturies comu marcu específicu d’actuación. Nesos díes nació la que se nomaría República Independiente d’Obreros y Campesinos d’Asturies, proclamada poles bases obreres, al marxe de les organizaciones polítiques españoles, y defendía pol Tercer Comité Revolucionariu, que presidió Berlarmino Tomás.
Nel riscar del 5 d’ochobre de 1934 declarábase n’Uviéu la República Socialista d’Asturies, entantu les fuercies obreres de distinta seña (comunistes, anarquistes, socialistes…) atacaben dellos cuarteles de la Guardia Civil y otros cientros de poder per toa Asturies, amosando’l poder obreru, sobro tou nes cuenques mineres y tola zona centru demientres 15 díes, enantes de que la represión a cargu del gobiernu español fixere cayer tol so pesu represivu sobre’l nuesu pueblu, dexando un saldu de más de 1.200 muertos pente los revolucionarios frente a los 300 pente militares, guardies civiles y guardies d’asaltu. Ensin escaecer la brutal represión posterior, que, sicasí, nun se pue comparar a la qu’hubo tres la Guerra Civil.
Papelos llanzaos sobre la población asturiana pola República Española
De magar aquella llarga derrota y la xabaz represión posterior el pueblu asturianu vien siendo castigáu demientres ocho llargues décades. Carecen los asturianos d’un retayu continuu de drechos y un bombardéu inmisericorde a la so autoestima que devién nun sentimientu d’inferioridá y derrotismu col que los asturianos viven marcaos y de los que ye difícil escapar. La represión más o menos direuta carecida polos asturianos dende entós (llingüística, cultural, social, económica, obrera…) y la man de fierro cola que se controla dende Madrid tolo que se decide p’Asturies son consecuencies direutes d’esti alzamientu del pueblu asturianu, un castigu col que faen por caltenelu cola tiesta gacha, sumisu ya inorante de si mesmu.
La recuperación de la Memoria Hestórica Asturiana ye imprescindible pa devolver al Pueblu Asturianu a la época en que foi valiente, capaz de lluchar y sobre tou, seguru de si mesmu y de la so propia identidá. Torna Ochobre y nun escaecemos, nun queremos escaecer.
Sabemos quienes fueron, quienes fuimos, quienes somos. Nun mos rendimos.
Llucía F. Marqués
This work is licensed under a Creative Commons Attribution 4.0 International License.
