La Bedur ye un grupu nuevu de música tradicional asturiana qu’ufre una nueva posibilidá estética dientro de la gran etiqueta de «música tradicional» o «música folk»
Yá ta a la venta y en toles plataformes musicales La Bedur, el primer trabayu homónimu d’esti tríu nuevu de música tradicional asturiana formáu por músicos formaos nel movimientu de la música popular asturiana y con abonda esperiencia a recostines: Miguel Rodríguez Monteavaro (flauta travesera), Pepín de Muñalén (vigulín) y Rodrigo Roces Nuño (pianu).
Los tres confluyeron nes sos reflexones sobre cómo da-y álitu a la tradición dende un puntu de vista actual. Asina, el pianu, la flauta travesera de madera y el vigulín axúntense a la hora de crear un espaciu poco transitáu pola música contemporánea asturiana.
L’álbum ta formáu por trece temes instrumentales y unu cantáu -nel que collabora Mariluz Cristóbal Caunedo- de música tradicional influenciada por otros sones como’l bal-folk, jazz, pop, celta o clásica contemporánea.
Esti primer trabayu discográficu del grupu ya ta colgáu nes plataformes en rede y físicamente tien formatu de llibru didácticu empobináu al espardimientu del repertoriu tradicional.
Más p’alantre La Bedur cuenta con presentar textos lliterarios de Xuan Bello, Lorena Souto, Hedoi Etxarte y Javier de Pendia, que van arredondiar un diseñu que cuerre a cargu del artista plásticu Miguel Galano.
Susana Sela
This work is licensed under a Creative Commons Attribution 4.0 International License.
