Conducir un camión o un autobús faise más peligroso -pa un mesmu y pa los demás- según avancen los años, esi ye’l principal algumentu de los sindicatos a la de convocar una serie de fuelgues del sector del tresporte per carretera
Les xornaes de fuelga van entamar el día 28 d’ochobre, pa siguir, si nun hai meyores na negociación, los 11, 28 y 29 de payares, 5 y 9 d’avientu y que convertise n’indefinida si nun hai alcuerdu de magar el 23 d’avientu, bloquiando los tresportes en feches clave, como les rebaxes del Vienres Prietu nel comerciu, la ponte la Constitución y Nadal.
Los trabayadores denuncien el “bloquéu sistemáticu” de les sos demandes per parte del Gobiernu y les distintes patronales, que nun quieren oyir falar d’alantrar la edá de xubilación de los conductores, pesi al altu índiz de siniestralidá na carretera a partir de que los conductores superen los 55 años. Tamién reclamen midíes p’ameyorar la precaria situación d’estos profesionales, que xenera serios daños a la so salú.
Los sindicatos aseguren qu’hai propuestes p’ameyorar les condiciones llaborales del sector paralizaes nel Congresu de los Diputaos y nel Senáu dende va una década y reclamen al Gobiernu que les impulse y a les empreses que reconozan la peligrosidá del trabayu, asina como que s’amenorguen les cotizaciones a la Seguridá Social, que son seis vegaes más altes nesti sector que n’otros por cuenta de la alta incidencia de los accidentes de trabayu y enfermedaes profesionales. La xubilación parcial con contratu de relevu voluntaria, na que’l conductor pueda compartir parte del so trabayu con daquién más nuevu, ye otra de les midíes que defenden, siquier mientres s’implementen los coeficientes reductores de xornada venceyaos a la edá, la penosidad y la peligrosidá del oficiu.
This work is licensed under a Creative Commons Attribution 4.0 International License.
