Con elli, son siquier trelce muertos no que va d’añu, cinco nun mes, que sumen a más de 50 accidentes bien graves

Ayeri, mientres en Delegación del Gobiernu -ante’l xorrecimientu de la siniestralidá llaboral nos caberos dos meses- sindicatos, gobiernu y patronal aconceyaben pa “poner les bases d’una seguridá nos trabayos y poner fin a los accidentes”, rexistrábase un nuevu accidente mortal en Xixón, nesti casu, un home de 62 años, trabayador de la construcción.

Con él son (siquier) 13 les víctimes mortales, cinco en menos d’un mes. De primeres, amosar les condolencias a los familiares de toles persones finaes. De segundes, ver onde recai la responsabilidá de tantes muertes. 

El problema de los accidentes llaborales nun ye nuevu.  Asturies rexistró 15 accidentes mortales nel 2023, dos más que nel exerciciu anterior, a los qu’hai que sumar 69 accidentes bien graves.  Sicasí, les cifres de los postreros dos meses respiguen, nun hai selmana ensin siquier una noticia d’esti tipu y por fin paez que nel gobiernu dase por enteráu de lo qu’asocede, ensin dulda gracies a que la prensa fíxose ecu de la situación y nun pueden siguir faciendo que nun conocen el problema.

La precariedá llaboral y l’esplotación -horarios estendíos, sobrecarga de trabayu, escasez de personal, material poco afayaizu…- y l’incumplimientu de la Llei de Prevención de Riesgos Llaborales per parte de les empreses son factores clave nesti problema. Resulta más barato faer frente a una improbable sanción qu’al sobrecostu qu’implicaría implementar sistemes eficientes de seguridá, ensin escaecer que dientro de los medios de producción, la man d’obra ye’l más abondosu. 

Y mentanto nesta guerra tolos muertos cayen del mesmu bandu.

Nel Dos Santos

This work is licensed under a Creative Commons Attribution 4.0 International License.