Yá ta na cai’l compilatoriu ‘Semando Son’, qu’axunta dellos nomes mozos de la música n’asturianu
Yá pue alcontráse en toles plataformes musicales Semando Son o mercase’l CD del primer compilatoriu de música moza n’asturianu, Semando Son, editáu por musicasturiana.com, plataforma na que ya pue mercase, por 13 euros.
L’album, qu’inclui 12 temes d’estilos estremaos, grabóse’l pasáu xunetu nos Tutu Estudios de Corvera, baxo la producción Sergio Rodríguez, el diseñu y maquetación ye obra de la ilustradora xixonesa Cecilia Diaz y la producción executiva ye de Xicu Ariza, responsable de musicasturiana.com.
Los temes incluyios nel album son tres cantares inéditos de caún de los grupos que tocó na primer edición del Semando Fest el pasáu febreru: Alicia Villanueva y Luis Álvarez Pola, dos de los nomes nuevos de la tonada asturiana; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu qu’amesta música electrónica y asturiana.
Recuéyese asina la diversidá sonora de la música’l país que ta faciéndose pente la mocedá, ya que tolos artistes participantes tienen menos de 35 años; d’esta manera, la iniciativa trata de puxar pol relevu xeneracional na música asturiana y promocionar los nomes nuevos d’esta escena.
El discu presentóse oficialmente’l sábadu 12 d’ochobre nel Reguerada Fest, la feria d’empreses, lliteratura, música, artes visuales y escéniques y gastronomía qu’entama la Viceconseyería de Cultura, Política Llingüística y Deporte. Nel actu participaron componentes de los cuatro grupos, amás del mentáu responsable de la iniciativa, que falaron sobre los cantares que grabaron, firmaron CDs y aldericaron sobre’l relevu xeneracional na música asturiana.
This work is licensed under a Creative Commons Attribution 4.0 International License.
