Cuando nun falten les vies falten les llocomotores, o los vagones, o los maquinistes, o sinón, vienen con retrasu: la comedia del ferrocarril asturianu ye un non parar

Nesti casu lo que falta ye personal pa conducir los trenes. Los viaxes suprimios por esti motivu suben a 113 namás nun mes, más de tres al día, de los que 83 foron nos caberos 15 díes, ello ye, cuasi seyes diarios. A ellos hai que sumar les supresiones por falta de trenes, qu’el 3 d’ochobre algamaron l’ablucante cifra de 30 anulaciones. 

La plantiya ye corta, los sindicatos reclamen, polo menos, seis conductores más. Tamién les unidaes de llocomotores son escases. En xeneral, el ferrocarril viaxa baxo mínimos y nun garantiza’l serviciu de calidá qu’Asturies precisa pa caltener vertebráu’l so territoriu. 

Ca tren que falla ye muncha xente que queda tirao, xente qu’aporta sero al trabayu, a clases, que pierde una entrevista, que pierde otru tresporte, que nun va volver a confiar nel ferrocarril pa los sos desplazamientos. De pocu valen bonos de tresporte y precios regalaos, si nun hai trenes que cumplan los horarios.