El 25% de la población n’Asturies ta en situación de riesgu de probitú ya esclusión social. Ello implica qu’hai aprosimao 250.000 persones, ún de ca cuatro asturianos, que nun dispón de los medios mínimos pa vivir dignamente
EAPN Asturies vien de presentar los datos del informe “L’Estáu de la Probitú n’España y Asturies: Informe AROPE 2024” na Sala Europa de la Xunta Xeneral del Principáu d’Asturies, coincidiendo col Día Internacional pa la Erradicación de la Probitú.
La principal conclusión ye que n’Asturies, el 25% de la población atópase en situación de riesgu de probitú y esclusión social, bien llueñe de la consecución de los oxetivos de l’Axenda 2030 y bien llueñe tamién de la tasa estatal, que baxa al 17’4.
Eso traduzse en qu’hai 250.000 asturianos que nun cunten colos medios básicos pa llevar una vida digno, de los cualos cuasi la metá (el 48%) carez niveles de probitú severa. Les tases dispárense ente menores de 16 años y families monoparentales.
L’aumentu del costu de la vida, alimentos, suministros y gastos rellacionaos cola vivienda neutralizó’l llixeru aumentu de renta media de los caberos años. Cuasi’l 40% de los ingresos de les persones en situación de probitú diben parar a la vivienda nel añu 2023, cuando entá nun se produxere’l fortísimu xorrecimientu de precios del 2024.
L’informe destaca que’l xorrecimientu económicu d’un país, por sí solo, nun ye abondo pa garantizar condiciones de vida digno a toles persones, sinón que tien d’acompañase con polítiques redistributives más intenses, una y bones l’aumentu del PIB nun se reflexa n’amenorgamientu de probitú “Erradicar de forma efectiva la probitú y l’esclusión social pasa por dar puxu a polítiques sociales estructurales, que se consoliden como parte de los derechos sociales propios d’un estáu de bientar y non solo respuendan a situaciones d’emerxencia” especifica’l mesmu, una y bones les tases de miseria sedríen entá más tarrecibles si se suprimieren les tresferencies sociales, dexando al 48% de la población en situación de probitú y evidenciando la ineficiencia del plantegamientu actual de la economía asturiana, que malpenes cubre les necesidaes de la metá de la población.
Llucía F. Marqués
This work is licensed under a Creative Commons Attribution 4.0 International License.
