La sovención de 55,5 millones d’euros a grandes empreses pa que contaminar yos salga más barato paez escasa a Azsa, ArcelorMittal, Minersa y Asturiana de Zinc, que recibirán en total 55,5 millones d’euros pa compensar el pagu que tienen que facer poles tonelaes de CO2 qu’emiten

La factura de la lluz inclúi ente los sos conceutos un pagu polos drechos d’emisión per tonelada de diósidu de carbonu (CO2) a l’atmósfera, una especie de “permisu por contaminar” pa les empreses que son grandes consumidores d’eletricidá. El costu actual del drechu por tonelada d’emisión ta en 60 €, lo qu’implica que con 55,5 millones sovencionamos la emisión de 925.000 tonelaes de CO2. En total eses cuatro empreses emiten -oficialmente- alredor de 7’5 millones de tonelaes añales nel exerciciu de la so actividá.

Simplificando enforma, los drechos d’emisión son un costu que tienen que pagar aquelles empreses que pola so actividá xeneren CO2, asignaos en puyes públiques. Suponse qu’el so altu preciu va afalar a les empreses a amenorgar les sos emisiones. Curiosamente, esti pagu por contaminar sovenciónase, con na menos que 300 millones d’euros en tol estáu, ello ye, que parte del costu d’eses emisiones acaba revirtiendo en toos, incluyíos los que sufren los efectos d’esa contaminación.

Les grandes empreses asturianes van recibir esti añu, según el llistáu provisional qu’espublizó ayeri’l Ministeriu d’Industria y Turismu, 55’5 millones d’euros, diez más que l’añu pasáu pero entá la metá de lo qu’elles reclamaben. 

Eses compensaciones pártense ente cuatro grandes factoríes industriales d’Asturies: les plantes d’Asturiana de Zinc (Azsa), ArcelorMittal, Minerales y Productos Derivaos (Minersa) y Asturiana d’Aleaciones (Aleastur); per primer vegada la planta papelera de Navia, Ence quédase fora d’estes ayudes. Azsa y Arcelor reciben les mayores ayudes del estáu.

This work is licensed under a Creative Commons Attribution 4.0 International License.