Bonos díes, bona xente.
Alborecemos ente’l borrín y la nublina nes zones baxes d’Asturies, tando escampláu nel restu con unes temperatures que tan alrodiu de los 11ºC, rexistrándose nel puirtu Payares 7,6ºC.
Güei van dir dixebrándose les nublines y borrinos del alborecer pa dexanos un día soleyeru y perguapu con unes temperatures másimes que subirán dalgo pero que nun van desentonar cola época na que mos atopamos, amás l’aire sedrá sele ya variable con brises pela costa.
Mañana xueves alboreceremos con escasa nubosidá o el cielu escampláu pero yá con vientu ábrigu que pue ser molestu na cordelera y dexar allí dalgo de nubosidá, amás por mor del efeutu foehn que fae esti vientu al so pasu peles montañes les temperatures en superficie medrarán en forma con másimes, esti día, que puen averase a los 23-24ºC. Yá pela tarde va dir surdiendo nubosidá media-alta y al finar el día llegarán les precipitaciones de la mano d’un frente fríu.
Pero ye durante’l riscar del vienres cuando tendremos les precipitaciones más abondoses, amás d’un descensu bultable de les temperatures que fadrá que nieve pela cordelera nes cumes más altes, pudiendo baxar la cota durante la tarde hasta los 1600m., cola llegada del aire fríu n’altor, provocando tamién xarabatos convectivos que puen venir acompangaos ,ocasionalmente, de truena y xarazu nel llitoral. L’aire sedrá de componente noroeste con raches fuertes en zones altes y en puntos de la costa.
El sábadu ya domingo entovía hai munches duldes, ye probable que tengamos un poco de too pero poco, yá lu diremos viendo.
Que paséis un bon miércoles collacies ya collacios.
Semeya que mos l’apurre la nuesa collacia Consuelo Vázquez y ye que tamos n’época de setes.
This work is licensed under a Creative Commons Attribution 4.0 International License.
