Como si d’una mala obra de teatru ambientada nel sieglu 17 se tratare, la “nobleza” aconceyará faciendo corte al rodiu los monarques, mientres aquellos que se consideren los sos súbditos aplaudirán embaecios ximielgando pendones de sangre y oru, humildándose voluntariamente y ufriendo los sos tributos que, en forma de premios pagaos d’una u otra manera pola sociedá, repartirá la princesina de turnu.

Al mesmu tiempu, ya más cerca de la época actual, cientos de republicanos asturianos dexaránse la voz glayando al altu la lleva qu’Asturies nun tien rei y que tamos fartos de fartones, demandando la fin d’unos premios entamaos por una fundación corrupta, el patronatu de la Fundación Princesa, onde tan les grandes fortunes d’España y dalgunos de los más direutos responsables de la crisis económica que carecemos.

Digo más cerca de la época actual y non nel sieglu XXI porque la barrera policial qu’arrequexará con menacies y armes a los manifestantes ye más propia d’una España del sieglu XX, con Pachu al mandu.

Andecha Astur tilda de “Humildantes” a los Premios Princesa “colos que se pretende dar puxu y credibilidá a la monaquía española n’Asturies, al tiempu que blanquiar el fechu de qu’esta casa rial ocupa’l poder namás por ser heriedera del franquismu”. Poro, llama a participar na concentración que tendrá llugar esta tardi na Plaza la Escandalera d’Uviéu, de manera que’l recibimientu a los reis d’España na entrega de los Premios Principiegos  se torne n’espeyu de la refuga a la monarquía y a los Borbones que ye, como amuesen toles encuestes va años, mayoritariu ente’l pueblu asturianu.

La concentración ta convocada de magar les cincu y media la tardi y continuará demientres tola entrega de premios, faciéndose sentir perriba les barreres policiales que, comu cada añu, tratarán de facer lo menos visible la presencia de los manifestantes.

Nel Dos Santos