Bonos díes, bona xente.
Alborecemos col cielu nuboso na mayor parte d’Asturies, sicasí na fastera ocidental yá se tan abriendo grandes claros o abancios con unes temperatures que tan alrodiu de los 12ºC, rexistrándose nel puirtu Payares 4,5ºC.
Güei tendremos una mañana seliquina cola apertura de dellos claros peronde llucirán los rayinos de sol anque nun calecerán muncho l’ambiente. Pela tarde cola llegada del aire fríu n’altor surdirán nubes de desendolque que mos puen dexar xarabatos dispersos cola posibilidá del dalguna truena pel llitoral y dalgo de nieve pela cordelera perriba de los 1600m, amás d’un descensu de les temperatures. L’aire sedrá gallegu pela mañana rolando a componente noroeste de tarde con raches molestes en puntos del llitoral y zones altes de montaña.
Mañana sábadu se confirma esa ventana de bon tiempu, sicasí na fastera más ocidental d’Asturies tendrán más nubosidá con dalguna precipitación. Nel restu esfrutaremos d’una mañana soleyera pero con ambiente fríu, anque de tarde aumentará les nubes ya tendremos de nuevu precipitaciones que sedrán más abondoses y frecuentes na metá ocidental y poco probables na oriental. Les temperatures seguirán en descensu y la cota de nieve rondará los 1800m pela tarde, cuando s’esperen les precipitaciones. L’aire sedrá sele ya variable en xeneral con dalguna racha molesta nel llitoral ocidental.
El domingu tamién se confirma un día pasáu per agua y ye que mos afeutará un frente retrogrado que mos empobina la dana col so desplazamientu al centru peninsular. Nesti casu al ser retrogradu les precipitaciones entamarán pela fastera oriental y s’estenderán al restu d’Asturies d’oriente a ocidente, siendo les lluvies más abondoses ya frecuentes na metá oriental, onde nevará nes cumes más altes, sobre too nel macizu de Picos d’Europa. Les temperatures camudarán poco, calteniéndose un ambiente fríu y l’aire sedrá variable con dalguna racha molesta nes zones más espuestes.
Que paséis un bon vienres collacies ya collacios.
Semeya que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
