La Coordinadora Ecoloxista d’Asturies sollerta de les altes concentraciones de tolos contaminantes en Xixón
La organización critica la falta de reacción per parte del Conceyu énte los elevaos índices de bencenu (recordemos que ye un axente altamente canceríxenu) y micropartícules. “Nin siquier tomaron midida dalguna p’alvertir a la población del peligru que supon l’alendar pa los grupos de riesgu”.
Los valores algamaos poles micro particules estos díes llegaron a los 111 µg/m3 de Pm 2,5 na zona del Lloredal, cuando la OMS encamienta unos valores llende de 5 µg/m3 en media añal y un valor d’alerta con una media diaria de 15 µg/m3. La tolerante normativa Española alza la so permisividá a una media diaria de 25 µg/m³, pero entá asina taríamos falando de casi quintuplicar el máximu aceptable pa la salú.
Ayeri algamóse tamién un valor de 12,9 µg/m3 de bencenu na zona del Lloredal. El valor llende encamentáu en media añal pola NR ye 1,7µg/m³ (valor envaloráu asumiendo como riesgu aceptable). La Organización Mundial de la Salú encamienta nun esponese a denguna concentración d’esti hidrocarburu, yá que nun atopa nengún nivel de concentración de bencenu nel aire per debaxo del cual nun se prevean consecuencies adverses pa la salú, por cuenta del so altu potencial canceríxenu.
Con estos valores de contaminación de partícules, en base al Índiz Nacional de calidá del Aire, espublizáu na web del Ministeriu pa la Transición Ecolóxica y el Retu Demográficu pa les Pm10, tola población puede esperimentar efectos negativos na so salú y los grupos de riesgu efectos muncho más serios.
La Coordinadora Ecoloxista d´Asturies denunció repitíes vegaes que Xixón vien presentando de los peores datos d’España en contaminación del aire por partícules en zona urbana, cuestión que se repite nos caberos años.
Poro, reclamen a les Alministraciones responsables de la xestión, l’executivu rexonal y el Conceyu, qu’actúen pa evitar un casu grave de salú pública “Na actualidá, la cantidá y calidá de los estudios que demuestren cómo afecta la contaminación ambiental a la salú de les persones, al desenvolvimientu de les funciones cognitives en menores d’ocho años y a la calidá de vida d’una población, nun pueden ser resalvaos por una clase dirixente que nun adopta les midíes necesaries poniendo asina en peligru a la población”.
Alberto Rodríguez
This work is licensed under a Creative Commons Attribution 4.0 International License.
