Bruseles abrió ya espediente sancionador contra’l Principado por incumplir los oxetivos de reciclaxe pal 2020, pero tampocu van cumplise los oxetivos del 2025
Ye previsible que les arques asturianes carezan un nuevu revés, una multa de 25 millones d’euros que la XE ya ta tramitando pa castigar a los asturianos por incumplir los oxetivos marcaos pal 2020 en materia de xestión de basories. Lo afitao ye que pa esa fecha la metá de les basories del continente pasaren por procesos de reutilización y reciclaxe, subiendo la cifra al 55% pal 2025, ello ye, l’añu que vien y algamando’l 65% diez años depués.
De fechu, dengún país de la XE algamó los oxetivos afitaos pal 2020 y de xuro tampocu lo fadrán pal 2025, pero Asturies alcuéntrase especialmente lloñe d’ellos, siendo previsible que seya un de los territorios más castigaos por ello. Dientro l’Estáu, Asturies ye la segunda que menos recicla, namás el 25% de les borrafes, tando pior namás que Galicia y mui lloñe de los 68’4% de La Rioxa o los 62% de Catalunya.
Acordies la información que la mesma COGERSA fae pública na so páxina web, l’añu pasáu enterráronse cuasi 300.000 tonelaes de papel, vidriu, envases metálicos, bricks y materia orgánico, tou ello aprofitable, nel vertederu de COGERSA, del que yá anuncien que-y queda pocu pa tar saturáu y precisa nuevos espacios. De pocu val l’enfotu de los ciudadanos si la basoria curiaosamente separtá se xunta en destín, s’entierra o s’ambura. El 75% de la basoria que se produz n’Asturies nun ye reciclao.
Esa mala xestión ye la que va tener que pagase. La sanción nun sedría de 25 millones direutamente, sinón qu’esi ye’l resultáu de la suma de la multa anicial de 1’5 millones a la qu’habría de sumar otra de 1’4 cada seis meses dende’l 2020 y hasta que llegue a cumplise l’oxetivu fixau pa ca fecha (50% del 20 al 24 y del 55% de magar xineru del añu qu’entra), daqué que, na optimista suposición de que se tomen darréu midíes pa correxir la situación, nun sumará menos d’esos 25 millones d’euros, que tendrán de salir d’una u otra mena del bolsu de tolos asturianos y asturianes.
La sociedá tien de poner de la so parte pa facilitar el reciclaxe, pero ye l’alministración la que tien de poner los medios, facilitando l’accesu a puntos llimpios y contenedores de reciclaxe, cumpliendo cola recoyida y sobre tou, recuperando la confianza de la población, mui mermada tres de los incendios y acusaciones contra Cogersa por mala praxis.
Alberto Rodríguez
This work is licensed under a Creative Commons Attribution 4.0 International License.
