Coincidiendo colos 90 años de la Revolución d’Ochobre del 34 la Casa Sindical de Xixón estrena un mural alusivu al mesmu
Llantada nel mesmu llugar nel que los trabayaores xixoneses llevantaren anantes de la guerra la Casa’l Pueblu de la CNT, la Sindical lleva décades siendo utilizada por estremaes organizaciones y sindicatos de clase pa los sos actos y aconceyamientos, siendo un referente pa la llucha obrera asturiana.
Les pintaes de solidaridá internacional y llucha obrera percuerren les sos muries de siempres, reñaciendo ca vegada que la estrema drecha les empuerca nun vanu intentu de boicó; pero nesti casu nun se trata d’una pintada a pie de cai, sinón d’un descomanáu murial de cincu pisos d’altor que representa la mítica imaxe del milicianu coles sigles UHP na gorra, que dinamita en man s’enfrenta al exércitu español. Enriba la imaxen, la lleenda “Asturies, Ochobre 1934” y debaxo “La llibertá nun se pide, Conquístase”, completando un mural qu’ocupa tola fachada drecha del edificiu. Un homenaxe a la clas obrera asturiana y a los que dieron la cara por Asturies nel 34, que resalta la vixencia de la so llucha.
Llucía F. Marqués
This work is licensed under a Creative Commons Attribution 4.0 International License.
