Bonos díes, bona xente.
Alborecemos col cielu nuboso ya con unes temperatures que tan alrodiu de los 11ºC, rexistrándose nel puirtu Payares 4,1ºC.
Güei tendremos nubosidá estratificada que va dir dixebrándose pa dexanos el cielu con grandes claros o abancios a partir del mediudía. Al escurecer volverán los estratos emburriaos pol vientu nordés con unes temperatures n’ascensu, sicasí onde temos espuestos al nordés la sensación térmica pue ser molesta.
Mañana martes vamos tener el cielu nuble por mor de los estratos na fastera central asturiana, tando más escampláu hacia la cordelera. Durante’l día van dir ganando terrén pa dexar el día nuble en casi toa Asturies cola posibilidá de dalgo d’orpín alrodiu de los cordales costeros con unes temperatures que van camudar poco ya col aire nordés que sedrá molestu nel llitoral, sobre too nes hores centrales del día y en zones altes de montaña.
El miércoles y xueves la situación sedrá mui asemeyada, con nubosidá baxa en forma d’estratos con vientu nordés pel llitoral y zones altes ya con unes tempertures con poca amplitú térmica, ente los 11ºC de mínima y los 16ºC de másima.
Que paséis un bon llunes collacies ya collacios.
Semeya que mos l’apurre la nuesa collacia Mary Pandiella.
This work is licensed under a Creative Commons Attribution 4.0 International License.
