Bonos díes, bona xente.
Alborecemos con nubosidá baxa na metá norte d’Asturies, sobre too na fastera central con unes temperatures que tan alrodiu de los 11ºC, rexistrándose nel puirtu Payares 8,7ºC.
Güei la nubosidá estratificada va dir dixebrándose pa dexanos el cielu con nubes ya claros o abancios nes hores centrales del día, tando más escampláu na cordelera y fastera más surocidental d’Asturies anque al finar el día entrará nubosidá perellí tamién viniente del sur. Les temperatures subirán dalgo y l’aire nordés pue soplar cafiante na costa asturiana.
Mañana miércoles nun vamos llibranos de les nubes baxes ya estratos durante tol día ya inclusu puen dexanos dalgo d’orpín alrodiu de los cordales del llitoral con unes temperatures que camudarán poco ya col aire nordés que seguirá soplando cafiante, sobre too nes hores centrales del día, en puntos del llitoral y zones altes.
El xueves van dir dixebrándose les nubes, abriéndose dellos claros nel trascursu del día con unes temperatures n’ascensu que sedrá más evidente los siguientes díes onde predominará’l cielu poco nuboso o escampláu con temperatures mui afayaices.
Que paséis un bon martes collacies ya collacios.
Semeya que mos l’apurre’l nuesu collaciu Xuan Nel Gonzali dende La Peral, el cordal de Bufarán cola típica boina cuando sopla’l nordés.
This work is licensed under a Creative Commons Attribution 4.0 International License.
