Bonos díes, bona xente.
Alborecemos col cielu cubiertu por nubosidá estratificao, amás sopla’l nordés cafiante pela costa con unes temperatures que tan alrodiu de los 13ºC, rexistrándose nel puirtu Payares 7,7ºC.
Güei vamos tener el cielu mui nuboso durante tol día cola posibilidá de dalgo d’orpín alrodiu de los cordales costeros con unes temperatures que camudarán poco, calteniéndose un ambiente seliquino en xeneral, sicasí l’aire nordés seguirá soplando cafiante pel llitoral.
Mañana xueves van dir dixebrándose les nubes baxes ya estratos, cola apertura de grandes claros o abancios, sobre too nes hores centrales del día con unes temperatures n’ascensu moderáu, algamándose los 20ºC na mayor parte d’Asturies.
Vienres, sábadu y domingu la estabilidá va ser total, anque peles nueches y alboreceres surdirá dalgo de nubosidá baxa na metá norte d’Asturies con unes temperatures suaves pa la época na que mos atopamos.
A mediu-llargu plazu sigue sin vese nada reseñable que mos traiga’l fríu y la nieve, de momentu seguimos cola calefación pesllada.
Estos díes ta la seronda nel so másimu esplendor y asina lo reflexa esta semeya que mos l’apurre’l nuesu collaciu Garzía Jorgín dende’l bosque de Montegrande en Teberga.
This work is licensed under a Creative Commons Attribution 4.0 International License.
