Delles muyeres acusen situaciones d’abusu y violencia, tanto física comu sicolóxica, por parte de paisanos, dellos bien conocíos nel ámbetu públicu y cultural asturianu

De magar el saltu a los medios de la denuncia interpuesta a Errejón son munches les muyeres que tan atreviéndose a falar alto y denunciar fechos asemeyaos que, toes sabemos, son más avezaos de lo que se quier admitir.

N’Asturies nos caberos díes salieron a la lluz cuatro nuevos casos, un periodista, un reconocíu miembru de la escena cultural asturiana -del que por agora nun se fexo públicu’l nome-, un activu miembru de les redes sociales del que munchos y munches ignoraben esa faceta y un cuartu, denunciáu llegalmente por abusos de mayor calibre, del que pol momentu nun se reveló la identidá. Les víctimes, dos moces que s’alcuentren, cuando falen de los fechos, cola refuga de parte de la xente que les arrodia, llegando a distanciase con dalgunos de los sos círculos ante la falta d’apoyu por parte l’entornu masculín, que prefier nun perder contautu con estes persones que defender los drechos de les muyeres. 

Un d’estos incidentes llevó a Alma Hidalgo, agora ex vocal de l’asociación Iniciativa pol Asturianu a dimitir del so cargu entantu nun seya un espaciu seguru, declarando en redes que “el feminismu tien de dir de la mán de cualesquier movimientu políticu y social”. Por agora sábese que l’espaciu Play Presta vien de rescindir la collaboración con un de los acusaos, suspendiendo la emisión del programa “Noticies a tou trapu” nel que participaba.

KiaraRodalv apunta nes sos redes a los sos (presuntos)  agresores con nomes y apellios, Xuan G. Vijande, periodista y presuntu abusador que reconoz nos sos mensaxes haber fecho “algo fuera de llugar”, a lo que resta importancia, y Mel Kenobi, ex pareya de la moza. 

Restar importancia ye quiciás lo que define esta situación. A ellos nun yos paez tan grave. Al entornu nun yos paez que seya pa tanto. Y al final hai que ser valiente pa decidir alzar la voz perriba los interrogatorios, les crítiques, los “nunsedrápatanto” o los “ye que ye una persona importante, nun podemos cortar relaciones con elli” a los que se tienen qu’enfrentar. Precisamente por ello ye tan importante da-yos tol apoyu y que ente toos y toes xeneremos, esta vegada en serio, espacios seguros. 

Llucía F. Marqués

This work is licensed under a Creative Commons Attribution 4.0 International License.