Bonos díes, bona xente.
Alborecemos col cielu poco nuboso o escampláu na mayor parte d’Asturies, sicasí no fonderu los valles tenemos nublines y borrinos y na fastera oriental y cordelera dalguna nube media-alta con unes temperatures que tan alrodiu de los 10ºC, rexistrándose nel puirtu Payares 7,5ºC.
Güei tendremos el cielu con escasa nubosidá una vegada que se dixebren les nublines y borrinos del alborecer con unes temperatures másimes n’ascensu ya col aire sele ya variable en xeneral.
Mañana llunes aumentará la nubosidá media-alta entrando pel sur d’Asturies con vientu ábrigu que sedrá sele en xeneral. Les temperatures camudarán poco, sicasí ascenderán les mínimes, dexándonos un ambiente chornosu pa la época na que mos atopamos.
El martes seguiremos col aire ábrigu que mos apurrirá nubosidá media-alta empuercándonos el cielu ya inclusu pue dexar dalguna gotera pela tarde, sobre too na fastera más surocidental y cordelera.
El miércoles tenderá a llimpiase’l cielu pa dexalu poco nuboso o escampláu a partir del mediudía con un ascensu de nuevu de les temperatures másimes.
El xueves la cercanía d’un frente atlánticu poco activu va empobinanos nubosidá media-alta durante la tarde, tando más escampláu y soleyeru pela mañana. Con unes temperatures que seguirán siendo mui altes.
El vienres pue cayer dalguna gotera anque nel cielu predominarán les nubes ya los claros o abancios con un descensu de les temperatures.
Y paez ser que la fin de selmana sedrá mui seliquina con escasa nubosidá y temperatures afayaices pero refrescando dalgo de nueche ya con másimes más contenies.
Que paséis un bon domingu collacies ya collacios.
Semeya que mos l’apurre la nuesa collacia Consuelo Vázquez y ye que tan les biesques d’encantu.
This work is licensed under a Creative Commons Attribution 4.0 International License.
