Ascienden a más d’800 los pueblos abandonaos n’Asturies, con un ritmu mediu de 14 más que queden ermos al añu
De les 859 parroquies asturianes, 287 son desiertos demográficos (menos de diez habitantes por kilómetru cuadráu) y 571 cuenten con menos de 12’5 persones por kilómetru cuadráu. Ello ye, más de la metá de les parroquies nes que se divide el territoriu asturianu ye o ta a piques de ser lo que los xeógrafos denomen un desiertu demográficu, el pasu previu al ermu. 226 d’ente elles, tienen menos d’ocho habitantes por kilómetru cuadráu, ello ye, tan en riesgu severu de despoblamientu dafechu, más si cuntamos la edá media de les poques persones que residen nelles, ya que si n’Asturies la edá media ronda los 50 años (49’4 l’añu pasáu), nes parroquies rurales, que son les afectaes pola despoblación, la edá media ronda los 73 años.
Acordies los datos recoyíos pol Sadei va dos años, hai 811 unidaes de población -pueblos, ciudaes, llugares, villes…- deshabitaes n’Asturies, el 12% del total, entantu qu’otres 304 (4,33%) tienen namás 1 habitante -304 asturianos y asturianes que viven solos nel so pueblu- y en 4.659 (66,88%) viven pente dos y 50 persones.
Ello implica decenes de miles de cases vacíes, con conceyos onde hay más viviendes deshabitaes qu’ocupaes, una situación que contrasta cola nomada “crisis habitacional” de falta de vivienda y espoxigue de los precios d’alquileres. Lloñe de plantegase la rehabilitación y puesta en furrulamientu de servicios ya incentivos pa facilitar la incorporación de mocedá y families a esos pueblos, nesti momentu la “meyor” opción que se baraxa pa esos llugares ye ser convertios en cientros turísticos.
Nel Dos Santos
This work is licensed under a Creative Commons Attribution 4.0 International License.
