Los vecinos afectaos aconceyaron na plaza del Conceyu pa asistir a la mentada votación
El Plenu del Conceyu de Llaviana vota por unanimidá la moción de revocación del permisu d’investigación minera Ástur A. Ye la primer vegada que la cuestión s’alderica nel senu d’una institución afectada y l’unanimidá foi absoluta, tantu al valorar el permisu otorgáu como tremendamente perxudicial pa los vecinos y el territoriu afectáu como na votación, quedando poro aprobada la moción y debiendo asina treslladase al Conseyu de Gobiernu del Principáu d’Asturies la solicitú de revocación
del permisu.
Los grupos de la oposición manifestaron enterase del otorgamiento pola prensa o’l BOPA, lo que demuestra la escasa voluntá d’informar a la ciudadanía sobro un fechu tan trascendente y con implicaciones tan negatives.
Dende la Plataforma Salvemos Peñamayor valoren como bien positivu’l pasu dáu ayeri pol Conceyu de Llaviana y el so allugamientu claru en defensa del territoriu y la so forma de vida, pero alverten que van tar sollertes pa que la oposición manifestada se torne n’acciones reales. “Creemos que ye fundamental que’l restu de los Conceyos sigan el camín abiertu en Llaviana y que se abra la posibilidá de que los representantes de los distintos grupos políticos puedan manifestase en relación a esti permisu nun Plenu. Los vecinos merecemos saber que piensen los que nos representen y eses manifestaciones tienen de realizase nel senu de les instituciones de manera clara y pública” declararon dende la plataforma.
Alberto Rodríguez
This work is licensed under a Creative Commons Attribution 4.0 International License.
