Tamos ante una nueva demostración del metodu Barbón: anunciar grandes cambeos impulsaos poles reclamaciones ciudadanes, facer grandes declaraciones con munches semeyes en prensa y llamentar dempués cola boca piqueña que nun puede faelo, porque España nun lu dexa
L’executivu asturianu recula na tramitación de la reforma de la llei autonómica de Turismu anunciada p’avanzar na regulación de los pisos turísticos, sometiéndose a la norma española de Propiedá Horizontal y arrenunciando a facer meyores sobro ella.
L’oxetivu inicial anunciáu yera introducir nel nuevu testu llexislativu la obligación de que los dueños de pisos tuvieren que solicitar l’autorización a les comunidaes de propietarios pa dicha actividá, nel casu de que nun hubiera na afitao de man nos estatutos de la comunidá. Sicasí, les presiones recibíes per parte de propietarios de pisos turísticos y l’avisu que “podría contravenir en dellos puntos la llei de Propiedá Horizontal” (daqué que yá sabíen cuando presentaron la propuesta de llei) lleven al gobiernu de Barbón a arrenunciar a esi plantegamientu.
Cola nueva reforma de la llei de Turismu nun va haber un cambéu sustancial nos requisitos, llindándose estos a que la comunidá de propietarios del inmueble va poder esixir condiciones técniques a los pisos turísticos, con 18 meses de plazu pa iguales, frente a los dos meses anunciaos nel anteproyectu.
“La redacción definitiva prácticamente nun alteria nada, solo dalguna definición” declaró Manuel Herminio García, presidente de l’Asociación de Titulares de Vivienda Turística n’Asturies, quien considera, satisfechu, que’l testu final de la llei autonómica ye la demostración d’una marcha tras del Principáu.
Llucía F. Marqués
This work is licensed under a Creative Commons Attribution 4.0 International License.
