Bonos díes, bona xente.
Alborecemos col cielu escampláu ya con unes temperatures que tan alrodiu de los 11ºC, rexistrándose nel puirtu Payares 8,8ºC.
Güei sedrá’l día más calurosu de la selmana con temperatures másimes que van superar los 20ºC na mayor parte d’Asturies, amás el cielu va tar poco nuboso o escampláu anque al atapecer surdirán dalgunes nubes altes. L’aire sedrá sele ya variable.
Mañana vienres tovía tendremos una mañana seliquina ente nubes ya claros o abancios pero pela tarde la llegada d’un frente atlánticu fadrá qu’aumente la nubosidá y mos dexe precipitaciones de calter moderáu al escurecer con unes temperatures qu’anicien un descensu. L’aire seguirá siendo variable con dalguna racha moderada durante los xarabatos.
El sábadu vamos tener el cielu nuboso cola apertura de dellos claros nes hores centrales del día con unes temperatures que siguen baxando ya col aire sele ya variable.
Paez que’l domingu la posición de les altes presiones van permitir que mos entre puxarra atlántica dexándonos nubosidá abondosa y precipitaciones febles con unes temperatures que van caltenese sin cambios.
Más a llargu plazu sigue viendose un refrescamientu, en principiu secu, que podría dexanos les primeres xelaes xeneralizaes pero esto yá lu diremos viendo.
Que paséis un bon xueves collacies ya collacios.
Semeya del puirtu de La Cubilla que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
