La organización, xuntamente con otres entidaes d’ELEN, denuncia la falta de reconocimientu de la oficialidá del idioma

Iniciativa pol Asturianu, xunto con otres asociaciones de reivindicación llingüística del Estáu, fizo llegar al Esame Periódicu Universal de la Organización de les Naciones Xuníes la difícil situación na que s’atopa la llingua asturiana. L’Esame Periódicu Universal ye un mecanismu del Conseyu de Drechos Humanos de les Naciones Xuníes nel que se fai balance de la situación de los drechos humanos en los 193 Estaos miembros de la ONU.

La entidá asturiana, agrupada na Rede Europea pa la Igualdá de les Llingües (ELEN, poles sos sigles n’inglés) apurrió delles aportaciones sobre la falta de reconocimientu de drechos de los falantes d’asturianu. De manera concreta, la organización criticó la falta de desencolcu y de d’implementación plena de la Llei d’Usu y Promoción del Asturianu después de más de 25 años de la so aprobación na Xunta Xeneral del Principáu d’Asturies. Iniciativa pol Asturianu recuerda tamién l’anomalía constitucional pola falta d’oficialidá de les llingües propies ya que  la Carta Magna nel so artículu 3.2 recueye que “las lenguas serán oficiales en las respectivas Comunidades Autónomas de conformidad con sus Estatutos”. L’Estatutu d’Autonomía del Principáu d’Asturies quédase curtiu cola llexislación d’angüañu respeuto al asturianu, ya qu’únicamente afita que “va a gozar de protección” y que “se promoverá’l so usu, difusión y enseñanza”. Na comunidá vecina de Castilla y Llión, l’ordenamientu nun pasa de referise a que sedrá oxetu de protección.

Iniciativa pol Asturianu treslladó tamién la negativa situación del idioma nes escueles, con les males condiciones llaborales del profesoráu pola falta d’Especialidá Docente. Esta reclamación tamién se fizo llegar n’otros alcuentros como’l que se tuvo col Conseyu d’Europa. L’asociación tamién inclúi nel informe la obstrucción constante per parte de múltiples organismos públicos pa desanimar a los ciudadanos nel usu del asturianu cola alministración.

La toponimia, cola falta de la recuperación de dellos conceyos, foi otru asuntu que contién l’informe; recordando l’usu de la toponimia deturpada en dellos casos.

L’usu del idioma nos medios públicos o la infrafinanciación de l’Academia de la Llingua Asturiana, respeuto al restu d’academies del Estáu, foi otru de los puntos que la entidá criticó na memoria presentada por ELEN.

La Rede Europea pa la Igualdá de les Llingües (ELEN), creada en 2012, ye la ONG europea que trabaya pola promoción, protección y bienestar de los idiomas europeos menos utilizaos, qu’agrupa a 174 organizaciones miembro que representen a 50 idiomes en 25 estaos europeos. ELEN trabaya n’estrecha collaboración cola Xunión Europea, la ONU (ECOSOC miembru), la UNESCO y el Conseyu d’Europa.

Susana Sela

This work is licensed under a Creative Commons Attribution 4.0 International License.