Darréu la intervención d’Iniciativa pol Asturianu, la xunta xeneral d’ELEN, qu’agrupa a 174 organizaciones llingüístiques d’Europa, aprueba una resolución a favor de la oficialidá

La Rede Europea pa la Igualdá de les Llingües (ELEN, poles sos sigles n’inglés) peslló esti domingu en Bilbao la so xunta xeneral añal cola aprobación d’una resolución de sofitu a la oficialidá de les llingües propies. Iniciativa pol Asturianu promovió esta iniciativa pa reivindicar el másimu reconocimientu pa les llingües d’Asturies nel Estatutu d’Autonomía. D’esta manera, ELEN súmase al Conseyu d’Europa, qu’en setiembre encamentaba a les instituciones españoles a declarar la oficialidá. Con estos nuevos apoyos les entidaes europees visibilicen el so compromisu con esta revindicación.

El vocal d’Iniciativa pol Asturianu, Inaciu Galán, representó a la entidá na xunta xeneral d’ELEN en Bilbao, onde recordó que “tamos nun momentu nel que podemos trabayar ensin exclusiones pol futuru del asturianu llogrando la oficialidá que ye lo que mos piden les instituciones europees y lo que pretende esta resolución de sofitu al idioma d’Asturies. Ye’l momentu pa la reflexón pa los políticos asturianos y pa dase cuenta de que la oficialidá ye la ferramienta constitucional que garantiza la plena igualdá de drechos. Ye una demanda que sofiten diversos entes de fuera ya d’Asturies como ELEN nesta resolución pero tamién el Conseyu d’Europa”.

L’alcuentru tamién valió p’averase a diverses cuestiones sociollingüístiques con diferentes presentaciones d’investigaciones, ponencies y comunicaciones como la interpretación de datos demollingüísticos y la dixitalización nel casu de les llingües minorizaes. L’activismu llingüísticu tamién tuvo un papel importante dientro del congresu cola participación de dellos representantes de les diferentes organizaciones que componen ELEN que van participar dientro d’una mesa redonda baxo’l títulu de ‘Diferentes enfoques del activismu llingüísticu’.

La situación de la llingua vasca, pol llugar de celebración del simposiu, caltuvo un llugar preferente; amás d’analizar otros idiomes como ye’l casu del galés. Tamién s’afondó nel papel que tienen que xugar les instituciones europees na defensa de la diversidá llingüística y sobre qué puede faer la Unión Europea pol futuru de los idiomes.

Susana Sela

This work is licensed under a Creative Commons Attribution 4.0 International License.