Bonos díes, bona xente.
Alborecemos col cielu nuboso y xarabatos intermitentes que son en forma de nieve perriba de los 1200m con unes temperatures que tan alrodiu de los 8ºC, rexistrándose nel puirtu Payares -1ºC.
Güei van dir remitiendo los xarabatos del riscar n’estes primeres hores, abriéndose dellos claros a lu llargu la mañana y quedar inclusu poco nuboso pela tarde en munches zones d’Asturies con unes temperatures que siguen en descensu ya col aire nordés que va soplar cafiante nel llitoral y zones altes, baxando entovía más la sensación térmica.
Mañana xueves alboreceremos con muncho fríu y xelando nes zones más favoretibles ya con nublines no fonderu los valles, asina y too’l cielu nun va tar escampláu, tendremos dalgo de nubosidá alta que lu empuercará con aumentu de les nubes a partir del mediudía. Les temperatures másimes subirán dalgo y l’aire sedrá variable y sele en xeneral.
El vienres seguiremos col cielu empuercáu de nubes medies y altes con un ascensu de les temperatures, situación que s’estenderá al sábadu yá con másimes qu’algamarán yá los 18ºC.
Que paséis un bon miércoles collacies ya collacios.
Asina llucía l’abellugu de Colláu H.ermosu esta nueche, semeya que mos l’apurre dende la so páxina de facebook.
This work is licensed under a Creative Commons Attribution 4.0 International License.
