L’occidente asturianu tamién tien un argayu, dende va tres años llargos; un que torga les comunicaciones col cientru’l país y tien consecuencies llacerioses pa los moraores de la fastera. Pero como nun conecta con España, sinón con Asturies, y los perxudicaos son “asturianos de segunda”, ello ye, de les esnales, nun hai priesa
N’abril del 2021 más de 20.000 metros cúbicos de pizarra y arenisca cortaron el tramu Curniana-Salas de l’autovía del surocidente (A-63), una vía que xune la mayor parte de los conceyos del surocidente.
El tramu yera utilizáu a diariu por unos 2.500 vehículos, de los que 380 son camiones, según les caberes estadístiques del Ministeriu de Tresportes, siendo la principal carretera pa llegar a Uviéu, Xixón y Avilés dende’l surocidente asturianu. “Lo más grave” apuntaba entós un vecín “nun ye’l retrasu de la obra de la autovía, que lo ye, lo pior ye qu’un solu argayu estrangule les comunicaciones de toa una comarca, el Surocidente asturianu, d’un tamañu equiparable al de tol País Vascu. Urxe repensar y actuar sobre tou el sistema de comunicaciones del Surocidente”.
La promesa entós foi igualu en dos meses. Sigue ensin iguar. “Equí tamién tenemos un argayu dende hai años y la A-63 sigue cortada ente Cornellana y Salas. ¿Tien menos drechu a abrir l’A-63 que l’A-66 o ye que como nun tien peaxe nun hai priesa n’abrir?” entruguen los afeutaos, que sienten que pa les alministraciones “Asturies fina pel Occidente en Curniana”.
El problema los argayos ye endémicu n’Asturies; malos trazaos, carreteres feches ensin consensuar con xeólogos, falta de prevención y retrasos etenros nes reparaciones debuxen un mapa de llaceria que caltien a Asturies desvertebrada.
Amás, la BAPA (Base d’Argayos del Principáu d’Asturies), creá nel 2014 gracies a una tesis doctoral y que recoyía tolos argayos de magar el 1980, permitiendo prever les zones de pelligru, dexó d’actualizase nel 2020, “por falta presupuestu”.
Llucía F. Marqués
This work is licensed under a Creative Commons Attribution 4.0 International License.
