Denunciar “l’irresponsable negacionismu climáticu que persiste política y socialmente” yera un de los oxetivos de la cadena humana qu’ayeri percorría la Sablera San Llorienzu, en Xixón
Asturies pol Clima cellebró esti domingu, a les 12.00 hores, con salida de los Xardines del Náuticu, una concentración y cadena humana pa reclamar a los gobiernos midíes pa facer frente a la crisis climática.
“Nun ye un desastre natural, ye’l cambiu climáticu” y “Menos toreros, más bomberos” son dos de les pancartes que podíen lleese na cadena humana, qu’aconceyó a cientos de persones n’El Muro de Xixón. Centrándose nel desastre de la DANA, denunciaron el cambiu climáticu comu causa y la mala actuación nes llabores de rescate y recuperación pola falta de personal, organización y medios, comu agravante d’una llaceria que ye en si mesma una llamada d’atención. Alvierten de la ya urxente necesidá de tomar midies p’aparar l’aportación humana al cambiu climáticu y de tar preparaos pa más catástrofes naturales, que lleven décades anunciándose y entá asina píllen desprevenios.
Demientres la concentración guardóse un minutu de silensiu poles víctimes, a les que se dedicó una sentía pieza de gaita.
Susana Sela
This work is licensed under a Creative Commons Attribution 4.0 International License.
