Iniciativa pol Asturianu critica l’ausencia del asturianu na rotulación esterior de la maquinaria nueva de llimpieza del Conceyu de Llangréu
Les dos nueves cubes de riegu y baldéu adquiríes pola estaya de Servicios Operativos y presentaes pol equipu de gobiernu a finales d’ochobre presenten na so serigrafía esterior namás la versión en castellán de la imaxe corporativa municipal y non de forma billingüe como venía asocediendo d’avezu.
Iniciativa resalta lo que considera dar pasos atrás na normalización social del asturianu. Nun escritu al la organización de defensa llingüística recuerda que’l topónimu tradicional Llangréu ye oficial dende xunetu del añu 2005 y que “l’usu de la toponimia oficial y del asturianu nestos vehículos ye una manera de visibilizar la llingua asturiana y de caltener un compromisu de normalización y de cumplimientu de la Llei d’Usu”.
L’asociación reclama la inclusión de la toponimia oficial nos nuevos vehículos de riegu y baldéu del Conceyu de Llangréu recuperando la presencia y usu normal de la toponimia oficial y del asturianu nos vehículos. Al mesmu tiempu, tamién pide que nun se repita l’escaezu de la presencia del idioma en futures campañes o cartelería de les diferentes conceyalíes del gobiernu llangreanu.
This work is licensed under a Creative Commons Attribution 4.0 International License.
