Esti elementu, qu’acudió al xuiciu con bandera d’España y glayando “arriba España”, yá tenía interpuestes con anterioridá delles denuncies per parte d’otros colectivos como les Muyeres de la Escandalera asina comu delles ordes d’alloñamientu
Pocos díes dempués de l’agresión a un miembru del Sindicatu d’Estudiantes y Esquierda Revolucionaria, el 14 de setiembre a manes d’un grupu de facistes de Núcleu Nacional en Xixón, otra compañera d’estes organizaciones y vocera de Llibres y Combatives recibía una llamada d’un reconocíu facista que d’avezu allega a les movilizaciones feministes con insultos y menacies a les muyeres que participen nelles.
Nesti casu l’agresión foi telefónica, con una llamada insultante y menaciadora na que xustificaba l’anterior agresión, col argumentu de que “ye de xacíu que se yos agreda, si faen actividá política pública” y alvirtiendo de qu’habría más agresiones si nun arrenuncien de la so llucha pola igualdá.
“Sabemos que’l feminismu combativu y de clas ataca directamente al migollu del sistema capitalista y, poro, estos facistes y los grupúsculos que tán abondando, como Núcleu Nacional, el Frente Obreru, Faer Nación o Revuelta tienen tantes ganes de vengase d’esti poderosu movimientu, de la clas y la mocedá obrera y de tolo que güela a esquierda y a llucha polos drechos democráticos más básicos. Nun son quien a soportalo y salen a vertir públicamente tol so odiu, faciendo por amedranar”, declaren dende Llibres y Combatives, qu’achaquen a los discursos d’odiu, racistes, lgtbifóbicos y negacionistes de la drecha y l’estrema drecha españoles l’espoxigue d’estes actitúes, destacando tamién la connivencia de la policía ya’l sistema xudicial “Y tou ello énte la pasividá d’una esquierda reformista que nun fai nada por frenar l¡avance de la estrema drecha”.
Tantu nel casu de l’agresión física previa, que darréu siguió con amenaces verbales ya intimidación, como nel casu de la llamada recibida, les menacies nun van namás dirixíes a ellos, sinón a toles compañeres y compañeros del Sindicatu d’Estudiantes y de Llibres y Combatives, a los movimientos sociales y activistes combativos.
L’afrellada decidió denunciar darréu, lo que derivó nun xuiciu celebráu l’once de payares al que l’acusáu presentóse con una bandera d’España col escudu recortáu y al berru de “arriba España”.
La condena consiste nuna multa de 300 euros más una indemnización y caltiense la orde d’alloñamientu de 300 metros mientres seis meses. “Ta nidio qu’esta victoria nun ye casual, sinón frutu de la llucha y l’organización colectiva, por eso ye una victoria del movimientu, que manda un mensaxe bien claro a toos estos facistes que dirixen el so odiu escontra les muyeres, el colectivu LGTBI, les persones migrantes: vamos siguir dando griesca contra’l facismu, entamándonos y señalando ensin mieu a quien ataquen los nuesos drechos y esixendo sentencies exemplares. ¡Al fascismu nun se-y alderica, combátese-y!”.
Nel Dos Santos
This work is licensed under a Creative Commons Attribution 4.0 International License.
