Bonos díes, bona xente.
Alborecemos col cielu nuboso y con raches de vientu gallegu moderáu que llocalmente son fuertes nel llitoral y zones altes con unes temperatures que tan alrodiu de los 13ºC, rexistrándose nel puirtu Payares 4,4ºC.
Güei tendremos el cielu mui nuboso pero finalmente sin precipitaciones con unes temperatures en llixeru descensu y col aire gallegu que pue soplar con raches moderaes a fuertes en zones de costa y puntos altos de la cordelera.
Mañana xueves la llegada d’una borrasca de pasu rápidu pel Cantábricu va empobinanos, de primeru, vientu gallegu baxu con raches mui fuertes nel llitoral y zones altes amás de mui mala mar con un ascensu moderáu de les temperatures. Al atapecer con la rolada de vientu por mor de la llegada d’un frente asociáu a dicha borrasca va dexanos precipitaciones y xarabatos de calter moderáu y un descensu bultable de les temperatures que fadrá que surda la nieve al finar el día perriba de los 1500m.
Durante’l riscar del vienres tovía tendremos dalgún xarabatu pero dirán perdiendo intensidá ya frecuencia con una cota de nieve que baxa dalgo más hasta situase perriba de los 1300m.
Esti día alboreceremos ente nubes ya claros o abancios ya con unes temperatures baxes, calteniéndose durante tola xornada un ambiente fríu ya ivernal a pesar de les nuebes ya claros del cielu.
El sábadu la entrada de vientu ábrigu fadrá subir bultablemente les temperatures con raches mui fuertes en zones altes y espuestes, sobre too pela tarde, amás mos apurrirá nubes medies y altes qu’empuercarán el cielu.
El domingu alboreceremos col efeutu foehn por mor del pasu del vientu ábrigu sobre la cordelera ya tendremos un riscar y un alborecer mui cálidos con temperatures que puen averase a los 20ºC a pesar de tar n’hores nuecherniegues. Durante’l día seguiremos col cielu empuercáu de nubosidá media-alta y raches fuertes de vientu nes zones altes de montaña ya en puntos del llitoral, nun sedrá hasta’l riscar del llunes cuando vuelvan a normalizase les temperatures cola entrada de vientu gallegu y l’aumentu de la humedá.
Con esti pronósticu muncho precuru la fin de selmana col fuéu nel monte, vamos tener un amagüestu de temperatures altes, baxa humedá y fuerte vientu.
Que paséis un bon miércoles collacies ya collacios.
Semeya que mos l’apurre’l nuesu collaciu Pachu Harmesto Hevía, dende Peña Maín col Picu al fondu.
This work is licensed under a Creative Commons Attribution 4.0 International License.
