La formación que revolucionó la pandereta n’Asturies va presentar el 29 payares el so trabayu ‘286 Llunes’, un EP de cinco temes con protagonismu de la electrónica

Vuelven Herbamora. Dempués d’once años ensin publicar música nueva, el quintetu de pandereteres presenta’l so tercer trabayu discográficu: 286 Llunes. Nél van poder sentise cinco cantares nos que les percusiones, el xuegu de voces y la electrónica son protagonistes a lo llargo d’unos temes enllenos de presencia y sensibilidá. Una amuesa d’ello ye ‘Lluna de collecha‘, el primer adelantu del EP.

‘Lluna de collecha’ ye una composición de Ruth Suárez sobre una siega de Riballagu (Senabria), una mirada a la vida d’antañu, «onde’l trabayu de les muyeres yera mui pocu valoráu», como comenten Herbamora. «Con tou y con eso, la siega yera una fiesta, un motivu de cortexu, d’alcuentros y aprendizaxes, polo que pa nós presentar esti tema ye pensar nel nuestru raigañu, na nuestra semiente, nes nuestres güeles y más, que fueron y van ser los nuestros referentes», despliquen. La lletra ye tradicional y «fala del desencuentru, del desamor. Reconocelo y abrazalo como sentimientos humanos de los qu’aprender pue entendese tamién como collecha: la integración d’aprendizaxes».

Con esti single, la formación integrada por Elena Rodríguez Martínez, María Gavieiro Álvarez, Paula Cristóbal Caso, Natalia Nuño Rodríguez y María Vázquez Álvarez, amiesta electrónica y trabayu vocal. Vuelven asina al camín qu’abrieron con ¡Sali, L.luna! (2007, L’Aguañaz), pero actualizando la sonoridá a les tendencies musicales d’anguaño. En diez díes va poder comprobase too esto cola publicación en CD y en toles plataformes musicales de la qu’apunta a ser una de les referencies discográfiques más interesantes del añu.

21 años anovando la tradición

Herbamora ye’l grupu que revolucionó la pandereta asturiana. La formación nació en 2003 cuando seis muyeres percusionistes y cantantes venceyaes a la cultura tradicional axúntense con un oxetivu: dar aire nuevo al mundu de la pandereta y sacala de los estereotipos nos que taba arrequexada. Asina ye como s’estrenaron con ¡Sali, L.luna!, un trabayu con cantares que van de la fusión col jazz, funk y rock a la tradición nel so estáu más puru. Con él ganaron el Premiu al Meyor Cantar en Llingua Asturiana y tuvieron nominaciones nos premios AMAS. En 2013 asoleyaron N’acústicu, un EP muncho más desnudo musicalmente, pero compuesto con una finura y una sensibilidá d’altor. El so tercer trabayu va amosar por qué siguen siendo les revolucionaries de la pandereta.

Susana Sela

This work is licensed under a Creative Commons Attribution 4.0 International License.