Bonos díes, bona xente.
Alborecemos col cielu nuboso y raches fuertes de vientu con unes temperatures que tan alrodiu de los 15ºC, rexistrándose nel puirtu Payares 6,4ºC.
Güei’l pasu rápidu d’una borrasca per Cantábricu mos va dexar, vientu fuerte, mui mala mar y un descensu de les temperatures al atapecer cola llegada d’un frente fríu asoaciáu a la borrasca. La mañana entovía la nubosidá nun sedrá mui abondosa ya nin tendremos precipitaciones, amás por mor del aire ábrigu les temperatures subirán dalgo. Al atapecer, col pasu del frente, l’aire rolará a componente noroeste, descendiendo les temperatures y apurriéndones precipitaciones abondoses qu’anicialmente sedrán de nieve peles cumes más altes de la cordelera pero con tendencia a baxar rápidamente hasta situase perriba de los 1300-1500m al finar el día.
Mañana vienres vamos tener nubes ya claros o abancios con temperatures baxes que mos dexarán un día con ambiente ivernal a pesar de la llume del sol.
El sábadu una borrasca atlántica situada enfrente de la península Ibérica va empobinanos vientu ábrigu que dirá coyendo puxu a lu llargu la mañana pa dexanos raches mui fuertes na cordelera ya en puntos del llitoral, mentantu nel cielu les nubes medies y altes lu empuercarán entemecies ente dellos claros o abancios con unes temperatures en bultable ascensu por mor del efeutu foehn al pasu pela cordelera.
El domingu sedrá un día mui asemeyáu, marcáu pol vientu ábrigu y les temperatures altes, inclusu en hores nuecherniegues que mos dexará tamién humedaes mui baxes col riesgu que supón pa la propagación d’incendios nel monte.
Durante’l riscar del llunes la entrada de vientu gallegu fadrá aumentar la humedá, baxar les temperatures y apurrinos precipitaciones.
Pa medieu y llargu plazu sigue sin vese na que mos meta de sópitu nel iviernu.
Que paséis un bon xueves collacies ya collacios.
Semeya que mos l’apurre la nuesa collacia María Suárez.
This work is licensed under a Creative Commons Attribution 4.0 International License.
