La Ca Conceyu de Llaviana lleva cerca d’un añu col comedor preparáu yá ensin llicitar la empresa de catering que lu atienda

Les families del CP Elena Sánchez Tamargo nun aguanten más. Nun entienden por qué,  con tou preparao p’abrir les sos puertes a mediaos del cursu pasáu, el comedor del centru sigue ensin tar operativu.

Los comedores escolares non solo cumplen una importante función d’atención a menores en riesgu d’esclusión, apurriendo un mínimu d’una comida completa al día, sinón que son cuasi imprescindibles pa que la conciliación llaboral de les families seya posible, n’una sociedá na que ye necesario que dambos proxenitores trabayen pa que los rapacinos tengan un bon nivel de vida.

Poro, son munchos los que yá tán plantegándose camudar de centru educativu, si nun s’atopa una solución inmediata pal serviciu, prometíu dende va años, anunciáu pa mediaos del cursu pasáu y depués pa l’entamu d’esti cursu escolar y que sigue ensin ufiertase a los estudiantes.

Lo único que falta ye que’l Conceyu de Llaviana lleve a cabu la llicitación pal serviciu de catering. Les families siguen ensin tener una respuesta clara nin detalles sobro los plazos d’apertura.