Bonos díes, bona xente.
Alborecemos con dalgo de nubosidá na metá centru-ocidental d’Asturies, tando más escampláu na fastera oriental con unes temperatures que tan alrodiu de los 8ºC, dalgo más nel llitoral ocidental por mor de les nubes ya rexistrándose nel puirtu Payares 4,6ºC.
Güei tendremos intervalos nubosos entemecios ente dellos claros o abancios que van dir ganando terrén a partir de la tarde, quedando poco nuboso o escampláu al atapecer con unes temperatures másimes n’ascensu ya col aire que sedrá sele ya variable.
Mañana xueves va tar poco nuboso o escampláu en xeneral con unes temperatures mínimes que seguirán siendo fresques pero con un ascensu bultable de les másimes, pudiendo algamase los 20ºC en munches zones d’Asturies, amás l’aire seguirá siendo sele y de componente sur.
El vienres tendremos dalgo de nubosidá media-alta que malpenes nublará’l sol con unes temperatures másimes que seguirán siendo altes. El sábadu aumentará la nubosidá pero l’ambiente entovía sedrá sele y el domingu la llegada d’un frente atlánticu pue apurrinos precipitaciones pero esto yá lu diremos viendo.
Que paséis un bon miércoles collacies ya collacios.
Semeya que mos l’apurre la nuesa collacia Mary Pandiella.
This work is licensed under a Creative Commons Attribution 4.0 International License.
