Finalmente’l conceyu de Tapia emitió nun va tramitar cambeos nes normes urbanístiques nel PXOU vixente que torguen la implantación d’una industria extractiva comu la que quier crear la minera Black Dragon Gold/EMC nel conceyu
La firme oposición vecinal al proyeutu mineru alcontró ecu nos sos gobernantes que, pesi a les costantes presiones por parte de Black Dragon, decidieron refugar la so solicitú pa camudar les normes urbanísitiques de manera que permitieren a la minera continuar col so proyectu de mina d’oru.
Dende la Plataforma Oru Non consideren qu’esta ye una escelente noticia “Ye una amuesa clara de que’l bientar común y la protección de la nuesa tierra tan perriba d’intereses particulares d’una empresa privada qu’aporfia en proponer un proyectu incaltenible, perxudicial pa la economía llocal ya’l mediu ambiente”.
Nes sos declaraciones remembren tamién qu’EMC/BDG vien amosando una y otra vuelta “un comportamientu allonxau de la trasparencia y la bona fe, basao na mentira, la prepotencia y la hipocresía. Recordemos, por casu, la destrucción del paraxe de los Llagos de Silva hai unos meses”.
La presión de la empresa foi continua, incluyendo insultos a los tapiegos, publicación de reportaxes padrocinaos, apurriendo cifres distorsionaes d’emplegu y silenciando la verdá: que se trata d’una actividá temporal, de malpenes una década, de la que namás se beneficiarán los inversores y que conllevaría el desaniciu de cientos d’emplegos estables nos sectores tradicionales, amás de los inevitables impactos ambientales qu’un proyectu d’estes característiques trayería consigo.
Dende la Plataforma Oru Non esperen agora que dende’l Principado s’emita una Declaración de Impactu Ambiental (DIA) negativa que protexa de manera definitiva a los vecinos de Tapia y de la comarca d’un proyectu que, denuncien, nun tien cabida nun futuru caltenible.
Nel Dos Santos
This work is licensed under a Creative Commons Attribution 4.0 International License.
