Esta selmana, en Paragüai daráse a conocer el veredictu de la organización internacional sobre’l naguau reconocimientu de la importancia cultural de la sidre n’Asturies. Pa amosar el so sofitu, los principales edificios públicos compartirán l’allumación navidiega con lluces verdis dende güei fasta’l domingu; ente los edificios que van allumase en verdi ta la Presidencia del Principado, el Muséu de Belles Artes, la torre La Llaboral, la Quinta Guadalupe de Colombres y el Centru Niemeyer. Afalen a la xente a facer lo mesmo nes sos ventanes, etiquetando en redes sociales semeyes cola allumación verdi col hashtag #AsturiesDeRestallu o enviales a conseyeriadecultura@asturias.org.

La declaración de Padremuñu Cultural Inmaterial de la Humanidá nun ye namás un reconocimientu de la específica identidá asturiana, tan venceyada a la sidre y los sos ritos, sinón que trae consigo una riestra de compromisos que’l Principado tendrá de cumplir los prósimos años, incluyendo el so estudiu nos currículums de primaria y secundaria y la protección de la cultura sidrera, nun momentu en que la menacia de los “taponinos” y l’adaptación al turismu de la hostelería faen pelligrar vezos centenarios.

Susana Sela