Bonos díes, bona xente.
“Baxen les temperatures y el paragües peslláu pero a mano”
Alborecemos col cielu nuboso y nublines ya borrinos no fonderu los valles con unes temperatures que tan alrodiu de los 12ºC, rexistrándose nel puirtu Payares 6ºC.
Güei vamos tener nubosidá abondosa con nublines ya borrinos que puen ser persistentes nos valles cola posibilidá de que caiga dalguna gotera o xarabatu feble ya dispersu, más probables na fastera surocidental y cordelera con unes temperatures en descensu. L’aire sele en xeneral de componente norte en superficie y gallegu n’altor.
Mañana martes alboreceremos con 3 o 4ºC menos nel termómetru, amás volverán a surdir nublines ya borrinos no fonderu los valles durante’l riscar que puen ser llocalmente persistentes nes cuenques de los grandes ríos, nel restu tenderán a dixebrase ya veremos dalgo’l sol. A partir del mediudía aumentu de la nubosidá y al atapecer tendremos precipitaciones ente febles ya moderaes de la mano d’un frente atlánticu emburriáu pol vientu gallegu que pue soplar con raches mui fuertes al finar el día en puntos del llitoral y zones altes.
El miércoles seguiremos con nublines ya borrinos en munches zones d’Asturies, dixebrándose a lu llargu la mañana nes zones más ventilaes y calteniéndose persistentes no fonderu de los valles con unes temperatures n’ascensu llixeru ya cola apertura de dellos claros o abancios pela mañana.
El xueves l’ascensu de les temperatures sedrá nidiu, polo menos ellí onde salga’l sol yá que no fonderu los valles seguirán atrapaos pol borrín y la nublina.
El vienres abriranse grandes claros o abancios con temperatures suaves tovía y a partir del sábadu la llegada de vientu norte de gran recorríu mos empobinará nubosidá abondosa precipitaciones persistentes y nevaes copioses pela cordelera, sobre too na fastera oriental, situación que pue estendese durante los siguientes díes, pero esto yá lu diremos viendo.
Que paséis un bon llunes collacies ya collacios.
Semeya que mos apurre’l nuesu collaciu Pachu Armesto Hevía.
This work is licensed under a Creative Commons Attribution 4.0 International License.
