Bonos díes, bona xente.
“Mañana seliquina, tarde d’agua y nueche ventosa.”
Alborecemos con borrinos ya nublines no fonderu los valles, tando poco nuboso o escampláu nel restu con unes temperatures que tan alrodiu de los 8ºC, rexistrándose nel puirtu Payares 1,2ºC.
Güei pela mañana la nubosidá dirá n’aumentu pa dexanos el día nuble, yá pela tarde un frente atlánticu mos dexará precipitaciones febles en xeneral que sedrán más probables y abondoses al atapecer. Les temperatures camudarán poco, calteniéndose un ambiente húmedu y fresco, sicasí al finar el día pue arreciar el vientu gallegu-baxu y dexanos raches moderaes a fuertes nel llitoral y zones altes, faciendo subir dalgo les temperatures.
El miércoles alboreceremos de nuevu ente’l borrín y la nublina nos valles asturianos pa dir dixebrándose y abriéndo dellos claros o abancios a lu llargu la mañana, pudiendo ser persistentes nes zones favoretibles como les cuenques de los grandes ríos. Les temperatures n’ascensu y l’aire sele ya variable.
El xueves perdemos humedá ya tendremos nubes ya claros o abancios con un ascensu nidiu de les temperatures que mos dexará un ambiente seliquino, amás l’aire sedrá sele ya variable.
El vienres vamos tener un día mui asemeyáu con nubes ya claros o abancios y temperatures suaves con másimes que puen averase a los 20ºC.
El sábadu sedrá un día de transición con una mañana más seliquina y un final del día yá con precipitaciones y descensu de les temperatures, pa dexanos un domingu, llunes, martes ya miércoles polo menos, con precipitaciones abondoses, descensu bultable de les temperatures y nevaes copioses na cordelera, situación mui favorable pa les estaciones d’esquí que podríen abrir pal fin de selmana siguiente, pero esto yá lu diremos viendo.
Que paséis un bon martes collacies ya collacios.
Semeya que mos l’apurre la nuesa collacia Consuelo Vázquez.
This work is licensed under a Creative Commons Attribution 4.0 International License.
