Bonos díes, bona xente.
” Endurezse’l temporal, lo peor el prósimu riscar”
Alborecemos con xarabatos y bastiazos intermitentes que son llocalmente fuertes ya con unes temperatures que tan alrodiu de los 7ºC, rexistrándose nel puirtu Payares -1,6ºC onde ta nevando moderadamente. A esta hora se fae usu obligatoriu de cadenes o neumáticos d’iviernu nel puertu Braña, Ventana, Somiedu, Lleitariegos, San Llorenzu, Connio, Zarréu y Tarna.
Güei vamos tener un día totalmente ivernal con xarabatos intermitentes que sedrán más frecuentes ya intensos cuantu más averaos a la cordelera estemos, amás en zones de montaña ya en puntos del llitoral seguirá soplando con muncha fuercia l’aire de componente noroeste que mos dexará un fuerte temporal nel Cantábricu. Les temperatures en descensu y la cota de nieve rondará los 1000m.
Durante’l prósimu riscar l’aire tenderá a amenorgar y rolar a componente norte intensificándose les precipitaciones cola entrada d’aire fríu n’altor que mos pue dexar dalguna tronada nel llitoral y fastera central, amás favorecerá los desplomes de la cota de nieve que podrá baxar hasta los 700m. A partir del mediudía l’aire fríu en toles capes de l’atmósfera tenderá a retirase, les precipitaciones a disminuir dalgo y la cota de nieve subirá a los 1100m.
Otra vegada, durante’l riscar del martes, una pelota d’aire fríu n’altor reactivará los xarabatos y baxará la cota de nieve de nuevu a los 700-800m, con bastiazos frecuentes ya intensos, sobre too na cordelera centru-oriental, onde sedrán persistentes y llocalmente fuertes con nevaes mui copioses nos puertos de montaña.
Pel día van dir remitiendo ya espaciándose anque en zones de montaña seguirán siendo frecuentes ya intensos con unes temperatures que descenderán un poquitín más ya col aire nordés que baxará entovía más la sensación térmica.
El miércoles malpenes tendremos precipitaciones que sedrán febles, disperses ya ocasionales pero’l cielu seguirá nuboso y l’ambiente mui fríu.
El xueves si les nubes lu permiten tendremos xelaes xeneralizaes que llocalmente, en zones de montaña, podrán ser fuertes, amás seguirá xelando nos puertos de montaña durante tol día, a pesar de los rayinos del sol.
Paez que’l restu la selamana tendremos un tiempu más seliquinu pero l’ambiente seguirá siendo fríu ya ivernal.
Que paséis un bon domingu collacies ya collacios ya felicidaes a toles Conchites, n’especial a la mio má ellí onde te.
Asina ta’l puirtu San Isidro esti domingu pela mañana, vamos ver como acaba’l miércoles.
This work is licensed under a Creative Commons Attribution 4.0 International License.
