Bonos díes, bona xente.
“Calar la cordelera, misión imposible”
A esta hora nieva intensamente en tola cordelera, dende ocidente hasta oriente, amás ta habiendo desplomes de la cota de nieve en tolos valles y nieva en munchos d’ellos perriba de los 500m. La situación de les carreteres ye per complicada, prauticamente la mayoría de puertos de montaña tan intransitables y na autopista’l Güerna ta prohibida la circulación de vehículos pesaos y los turismos tienen que dir con neumáticos d’iviernu, la mesma situación que nel puirtu Payares anque aquí si se permite l’usu de cadenes y nieva copiosamente con -3,1ºC de temperatura. Nel restu d’Asturies tenemos xarabatos frecuentes con unes temperatures que tan alrodiu de los 6ºC.
Güei vamos seguir con xarabatos frecuentes ya intensos durante tola mañana pa dir remitiendo a patir del mediudía n’intensidá ya frecuencia, amás la cota de nieve subirá a primera hora de la tarde hasta los 1000-1100m, pa baxar de nuevu al finar el día hasta los 800m cuando van volvese a intensificar les precipitaciones. Les temperatures camudarán poco y l’ambiente sedrá fríu ya ivernal. L’aire amenorgará dalgo y sedrá de componente norte.
Mañana martes dempués d’un riscar pasáu per agua ya con nevaes de nuevu importantes pela cordelera, dirán remitiendo les precipitaciones ya espaciándose los xarabatos con unes temperatures en descensu ya cola cota de nieve que rondará los 700-800m durante tol día. L’aire perderá fuelle pa quedar sele de componente norte-nordés.
El miércoles van caltenese intervalos nubosos nel cielu que puen dexar cayer dalguna gotera o xarabatín, más probables en zones de montaña onde seguirá nevando perriba de los 700-800m. Les temperatures van camudar poco y l’ambiente seguirá siendo mui fríu.
Tantu’l xueves como’l vienres les xelaes van ser xeneralizaes en toa Asturies llegando inclusu a puntos del llitoral col cielu poco nuboso o escampláu y el sábadu ya domingu tendremos dalguna nube más y les xelaes van retirase a los valles y zones de montaña del interior.
Que paséis un bon llunes collacies ya collacios y muncho precuru nes carreteres.
Semeya de Caunéu esti alborecer.
This work is licensed under a Creative Commons Attribution 4.0 International License.
