Dos trabayadores de la empresa enfréntense a tres años de cárcele caún por facer güelga nel 2020
El 5 d’ochobre de 2020 los y les trabayadores del Grupu d’Empreses ALSA entamaben una güelga col oxetivu de recuperar al 100% les llinies y frecuencies d’autobuses y el serviciu de taquilles, poner frenu a los numberosos despidos que taben produciéndose y facer cumplir la normativa llaboral establecida nel conveniu coleutivu.
Unes midíes que la empresa ALSA impunxere cola escusa de la pandemia de Covid 19 y que suponíen un riesgu pergrave pa la salú pública, pol enfacinamientu que sufríen los viaxeros y viaxeres, y la implantación d’unes condiciones llaborales abusives y illegales. Mientres ocurría too esto, la empresa cobraba subvenciones públiques millonaries, cola disculpia de la baxa ocupación de viaxeros y viaxeres impuesta poles midíes de prevención del Covid 19.
La güelga tuvo un siguimientu total de la plantiya, y les asociaciones vecinales y coleutivos sociales convocaren importantes manifestaciones de sofitu a la güelga y a les reivindicaciones de los y les trabayadores.
Col envís de llimpiar esta pésima imaxe de la empresa y desviar l’atención hacia los y les güelguistes, ALSA denunció desperfeutos nos sos autobuses, acusando d’ello a les y los trabayadores, dos de los cualos enfréntense agora a una petición de 3 años de prisión pa caún.
Por esa razón, creóse’l Grupu Sofitu a los y les güelguistes d’ALSA, col oxetivu de poner de manifiestu la inocencia d’estos trabayadores y denunciar la represión y el castigu seleutivu que se dirixe hacia quien defendíen los derechos llaborales y sociales, mientres se sigue faciendo oyíos sordos a les illegalidaes y al atropellu que la empresa multinacional taba cometiendo n’Asturies y que nunca merecieron nin una sola investigación.
Llucía F. Marqués
This work is licensed under a Creative Commons Attribution 4.0 International License.
