Andecha Astur entama esti vienres 13 d’avientu a les 20:00 hores na Casa’l Chino, en Cimavilla, una charra alderique alrodiu les causes, consecuencies y gueta de soluciones pal fenómenu de la xentrificación
La organización nacionaliega lleva décades denunciando’l duple problema de la turistificación y la inasequibilidá de la vivienda, dos cuestiones separtaes que sicasí converxen, agravando bultablemente la primera a la segunda. Nesi sen, destaquen, Cimavilla ye quiciás, xunto coles poblaciones del oriente asturianu, “el barriu d’Asturies que primero y con más gravedá careció’l procesu d’ocupación que pali que pali va espardiéndose per toa Asturies y que tien comu principal consecuencia la perda d’espacios propios ya’l riesgu de desaniciu de la propia identidá, ensin escaecer l’abusivu encarecimientu de la zona, especialmente no que cinca a vivienda, que va espulsando a los propios habitantes del barriu ante la imposibilidá de facer frente a los costes de vivir allí”. Por ello esti añu entamaron la campaña “Macillavi pa los Yospla” na que, dirixéndose a los playos na so fala reclamen el barriu pa ellos; esta charra ye la culminación d’esa campaña y nella participará una representación de los vecinos del barriu.
De la campaña y del venceyu d’estos problemes cola especulación capitalista y l’ausencia de respetu pola cultura y pueblos asturianos van falar Llucía Fernández, en representación d’Andecha Astur, Gelu García, autor de “La ciudad Infartada” y el presidente de la AAVV Gigia Cimavilla, Sergio Álvarez. Darréu les sos intervenciones habrá un alderique colos asistentes.
Nel Dos Santos
This work is licensed under a Creative Commons Attribution 4.0 International License.
